<<Home
Sunday, October 29, 2006
لما بتضيق الدنيا بيك اوي و تحس انك مش قادر تتنفس.. مش قادر تشوف كويس.. مش قادر تنطق كلام.. ومش قادر توصل احساسك..ـ
كأن في حد مانع عنك الهوا.. طافي كل الانوار.. سادد حلقك بايده.. و مش عارف يحس بكل وجعك..ـ
في اللحظه دي .. مع اقصى ضيق.. قبل انفجارك بثواني......ـ
بتحس ان في حاجه بتشدك اوي لربنا.. حاجه جواك بتقولك استنى.. في باب لسه مستنيك.. وراه حد حاسس بيك.. فاهم شكوتك و عارف اللي فيك..ـ
تلاقي نفسك من غير شعور بترمي نفسك قدامه و تخبط بكل قوتك على بابه.. ترمي كل حمولك.. وتسلمه امرك.. و تستنى.. و تتمنى..ـ
و على قد اخلاصك و الحاحك على قد مالنفس بيملا صدرك.. والنور بيفتح عينيك.. و الكلام بيهون عليك..ـ
وتلاقي قلبك بيتحرك وتعمل حاجات من غير ترتيب.. و تلاقي ردود افعال مالهاش حساب.. وتشوف ناس و تسمع كلام..ـ
و تحس ان الحياه كلها اشارات.. بتدلك على الطريق الصح.. كأن قرارك بيترسم جواك.. و كل الخوف بيتمحي.. وكأنه ماكان.. كأنك عارف كويس انت عايز ايه و مقرر من زمان..!!ـ
ياااااااااااه.. اد ايه مريح الاحساس ده.. اد ايه جميل.. لما بتاخد القرار و انت مش خايف.. و تثبت عليه مهما حصل لانك مطمن و عارف..ـ
ان اللي فتحلك بابه و سلمته امرك.. مش هايخذلك.. مش هايضيعك.. هايثبتك..و ولو بعد حين هايطمنك.. هايعوضك..ـ
بتحس بعدها براحه غريبه و طولة بال.. و كان الهم اللي اتشال من على قلبك جبال..ـ
خلاص انا عارف.. خلاص مانيش خايف.. من اي شيء يحصل.. من اي شيء يتقال..!!ـ
Saturday, October 28, 2006
احساس الوحده بيكبر جوايا اوي لما باحس اني باتكلم لغه مش مفهومه.. اوباقول كلام محدش سامعه..ـ
زي بالضبط الاخرس اللي نفسه يصرخ ومش قادر.. ولو صرخ مالوش صوت..!ـ
لما تقف لوحدك تماما في وسط الكل.. لما تعرض مشكله انت بس اللي عايشها.. لما توصف احساس انت بس اللي حاسه..ـ
تحس ساعتها ان الكل ضدك.. يمكن لانه خايف على نفسه و يمكن لانه خايف عليك و الاحتمال الاكبر انه خايف من الناس..ـ
و ممكن في عز خوفه ده يقول كلام يوجعك و يجرحك..ـ
يمكن بيدفعك لطريق معين و يمكن بيضغط عليك علشان تعمل حاجه غصب عنك و يمكن بيوريك عينه من اللي هاتشوفه لو فضلت مصر على موقفك..ـ
وكأنه بيقولك.. خليك حلو.. و اللي انت فيه النهارده اهون من اللي الناس هاتعمله فيك بكره!!ـ
احساس فظيع بعدم الاحساس.. و تبتدي تفكر .. الحل ايه؟؟ الحل فين؟؟
هل الحل في الاستسلام و اهي عيشه و السلام.. ولا هو في الوقوف و الدفاع عن الحق لاخر لحظه مهما كان التمن..؟
هل فعلا احساسك كله غلط و هم ادرى بيك من نفسك ولا محدش حاسس بحاجه اصلا؟؟
هل في حد ادنى من الوقت و العذاب قبل ما تاخد قرار و الناس تعترف بيه و تقبله ولا ممكن احساسك في وقت قصير يدلك و يكون كفايه؟؟
هل لو حد بيحبك اوي ده كفايه انك تعيش معاه حياه ناجحه حتى لو انت مش حابب الحياه دي او مش حابب نفسك معاه؟؟
هل ممكن انسان يتغير بالسهوله دي و ليه لازم الانسان ده يكون انت رغم انك انت اللي بتشكي و محدش اشتكى منك؟؟
هل تصدق وعود ضاعت قبل كده و لا تبقى انت اللي بتضحك على نفسك؟؟
هل لو استسلمت حد هايحس بيك بعد كده و لا هاترجع زي ماكنت بس يزيد عليك انك ماتفتحش بقك تاني؟
هل تجرب و تبقى الطيب اللي بيسمع الكلام و بيريح الكل على حساب نفسك ولا تبقى الشرير المتمرد اللي عايز راحته و بيدور عليها بعد كل التعب اللي شافه؟؟
هل تخسر اللي حواليك ولا تخسر نفسك..؟؟
هل ده يبقى حلال و لا حرام؟؟؟؟؟؟
الف هل و هل بتتنطط جوه راسي..ـ
كلهم عايزيني اكدب قلبي و احساسي..ـ
ابتدي من جديد و اعمل ناسي..ـ
كأن اللي فات ماكانش صعب ولا كان قاسي..!!ـ
Friday, October 27, 2006
هي اشمعنى مالطه اللي قالوا عليها في المثل لما حد يفضل يعيد ويزيد ومحدش يسمعه.. كأنه بيدن في مالطه!؟؟
بغض النظر.. هانشوف الحكايه دي بعدين..ـ
المشكله دلوقتي في الاحساس نفسه مش في مالطه.. احساس سخيف جدا انك تفضل تقول و تعيد وتعيد و تزيد..ـ
وتلاقي العيون اللي بتسمعك بتلمع و يمكن تملاها الدموع من التاثر والروس قدامك بتتهز و كان جواها زلزال من كتر الفهم و الموافقه..ـ
و كل الكلام اللي يتقالك تحس منه انك خلاص و لله الحمد قدرت توصل الاحساس و المعلومه..ـ
و سمعت الرد اللي اكدلك ده.. حسيت للحظه انك مش لوحدك.. ان في حد سامعك و فاهمك..ـ
و اول ما تلف و انت مطمن ان ضهرك محمي وان في حد وراك بيسندك.. تلاقي الكلام طار في الهوا..ـ
و العيون اتجمدت.. وكل حاجه اتغيرت.. و كانك لا قلت و عدت.. و لا في لحظه اتفهمت..ـ
تلاقي نفسك خير اللهم اجعله خير كانك كنت بتحلم وان الحوار اللي فات ده كله كان في المنام..ـ
و لو لسه عندك طاقه.. تبتدي من الاول تاني.. مره بعد مره.. و كل مره تلاقي نفس رد الفعل.. منتهى السخافه و عدم الاحساس..ـ
نفس التعاطف و التفاهم في وشك واول ماتتدور كله يتغير و ترجع تاني ريما لعادتها القديمه!!ـ
الا برضه هي مين ريما دي؟؟
Tuesday, October 24, 2006
عارفه ان الفتره اللي فاتت كانت كل الكتابات كئيبه و مريبه.. و يمكن كانت خناقات اكتر منها مجرد خواطر
واحاسيس.. بس الليله عيد.. و اليومين اللي فاتوا كان فيهم بجد احداث جميله حسستني بالعيد ..ـ
اينعم احنا متفقين ان الاوقات الحلوه بتعدي بسرعه و ان دايما بيكون في حد مستنيك تتبسط شويه علشان
ينكد عليك انما مش مشكله.. مش هاتكلم عالنكد النهارده..ـ ممكن بعد العيد!!ـ
المهم يرجع مرجوعنا لموضوعنا.. العيد بقى.. امبارح خير اللهم اجعله خير كانت ليله من اجمل ما يكون
و لله الحمد.. مكان جميل مع صحبه اجمل.. اتنين من احلى الناس اللي ممكن تعرفوهم في الحياة.. رشا و سمر..ـ
رشا مش هاتكلم عليها كتير علشان محدش يقولي دي كوسه و صاحبتك و المتحدث الرسمي بتاعك و الكلام ده..ـ
بس كل اللي هاقوله اني مش عارفه من غيرها الحياه كانت هاتبقى ازاي.. و يوم بعد يوم باحس اد ايه ربنا كريم اننا مع بعض و خصوصا في الفتره دي!!ـ
سمر بقى.. انسان جميل بكل مافي الكلمه من معاني.. شكلا و موضوعا.. روح صافيه و قلب ابيض و عقل كبير..ـ
و هي بتتكلم باشوف في عنيها حماس شابه كلها امل في الحياه.. و هي بتضحك باحس بفرحة طفله جميله.. وهي بتسمع بالاقي حنان الام بيطغى عليها.. جميله صحبتها بجد..ـ
النهارده بقى كان لقاءنا التاني في نفس المكان اللي قابلت سمر فيه صدفه اول مره قبل ماعرفها هنا عالبلوج.. الفيشاوي..ـ
احب الاماكن لقلبي في القاهرة و زاد ارتباطي بيه بزيادة الذكريات الجميله اللي ليا فيه..ـ عالفيشاوي الوقت عدى بسرعه جدا للاسف..ـ
بس هنا مش هاتكلم عن سمر لانها هي نفس الانسانه الجميله انما هاتكلم عن جوزها.. احد اخر الرجال
المحترمين اللي ممكن يسعدك الحظ و تقابلهم في الحياه.. اد ايه انسان محبوب وسط الناس البسطاء اللي في
المكان و اد ايه الكل فرحان بوجوده و مش عارفين يعملوا ايه علشان يرضوه رغم انه لا من اهل المنطقه
ولا هو مصري اساسا!!!ـ
رجعنا انا و ريكا في قمة الانبساط الحمد لله رغم اننا عارفين اللي مستنينا في البيت.. لكن ابدااااااا..ـ
ولااااااا يهمنا.. برضه مبسوطين.. على الاقل لحد باب البيت.. و بعد كده اللي يحصل يحصل..ـ
اتعودنا عليه و متوقعينه.. بس الجديد حسب الخطة الموضوعه اننا نغيره ان شاء الله..ـ
عارفين انه صعب و محتاج وقت بس احنا نقدر وعندنا صبر..ـ
وعندنا بعض..ـ
وعندنا سمر!!ـ
كل عيد وانتوا طيبين..ـ
Friday, October 20, 2006
النهارده كلامي عنك..ـ
النهارده انا هاكتب ليك..ـ
عايزه اقولك لو هاتقرا.. اني اسفه.. مابقتش قادره..ـ
لا اضحك عليّ و لا اضحك عليك..!ـ
مش قادره تاني اسكت و اخبي..ـ
كل اللي قلته مالمسش قلبي..ـ
كأنه خطبه في برلمان.. او حتى كلمه في مؤتمر..ـ
زود بعادي.. مازودش قربي!!ـ
ماعرفش يدخل بين ضلوعي..ـ
ماقدرش يمسحلي دموعي..ـ
رغم اني عارفه ان انت طيب.. وان قلبك مش بيكدب..ـ
مش حاسه ده كفايه لرجوعي..!ـ
عايزه اقولك اني حاولت..ـ
واني في الاخر فهمت..ـ
العيب لا فيك ولا هو فيّ.. وان مش دي القضيه..ـ
القضيه وببساطه.. ان انا في قربك تعبت!!!ـ
Thursday, October 19, 2006
am really not in the mood for it but thanx to 7ala.. am tagged and am asked about my childhood.. the first great part of my life -the second was my university years- which i really miss from time to time.. but they say i still have a part of it deep inside me although it doesnt show up all the time..!
anyway.. if am gonna talk about what i miss in my childhood then i have to start by the place i was living in.. it was a big compound in Ryadh for the university teachers.. in there, i had my lovely school, my club, my playgrounds and ofcourse my friends.
in those early years i was very independant.. i come home alone after school, i used to save my food to feed cats on the way home and give them milk at my door.. at first my mum used to get mad at me for bringing cats home everyday but by the time she gave up and brought me my own cat at home.. but that never stopped my old relation with other cats!!!
no one ever used to tell me to study.. i like to do my home work directly after school to make sure am done before 5 o'clock to watch TV.. i loved cartoons just like 7ala said.. lolo elsagheera, 3adnan waleena, elsanafer, saly wsandy whaidy...!!
in my childhood i was very much a boy in everything i do out side my home "tasharrod rasmy".. i taught myself football, booling, biking, skating and board skating.. and that last one was really hard.. i think i still have some scars left!!
the last thing but never the least.. is my friends, i had that family from syria living beside us.. they had 3 daughters and the youngest was my best friend Nada Elrifa3y.. she was more like a sister to me and i used to spend time at their home more than ours!!
those among other things i really miss about my childhood which i consider a great one.. el7mdolellah..
thanx again dear 7ala for bringing back some cute memories in such a hard time in my life!!
Sunday, October 15, 2006
عارفه ان الجو دلوقتي كله دين.. و الكل ايمانياته عاليه ان شاء الله.. و يمكن مش وقت الكلام اللي هاقوله
دلوقتي ولا وقت الاغنيه دي.. بس بجد اول ماسمعتها في مشوار من مشاويري اثرت في جدا و حسيت ان
كلامها وجعني شخصيا.. او انه بيعبر عني اوي ..و افتكرت رشا برضه.. وحسيت انها من ضمن الحاجات
المشتركه بينا!!ـ
احنا مش ملايكه بس يمكن احلامنا كتيره و كبيره و ساعات بتكون مستحيله.. بس عايشين على املها..
نفسنا نحققها حتى ولو بعد زمن.. و يمكن كمان علشان الاحلام دي بنستحمل حاجات برضه كتيره و كبيره
مش المفروض نستحملها و لانقبلها من الاول و نعمل حاجات تانيه كبيره و كتيره ونيجي على نفسنا علشان خاطر ناس ساعات تستاهل... و ساعات اكتر ماتستاهلش!!ـ
الخلاصه ان البني ادم مش لازم يعيش مضحي بنفسه علشان حد و لا يتخيل باي طريقه انه كده بيسعد حد
ولو الحد ده فرح بتضحيتك دي وساق فيها وهو عارف انك ضاغط على نفسك و ظالمها.. يبقى انا و انت اللي
غلطانين لاننا عملنا كده من الاول و لاننا سمحناله بكده و سبناله فرصه يفتكر ان ده حقه المكتسب وان ده
هو الطبيعي و المنتظر منك دايما..!!ـ
فاقد الشيء لا يعطيه..ـ
Monday, October 09, 2006
طبعا ريكا قالتلكم على الخروجه التحفه بتاعتنا.. اضبط كوبايتين شاي على اقدم قهوه في احلى حته في القاهرة.. جو تحفه و ناس مستمتعه بوقتها زينا بالضبط.. كم الونس و الجمال اللي في المكان و اهله بينطبع على كل اللي قاعدين.. حتى الاجانب بعد شويه بيبقوا شبهنا.. نفس الضحكه و نفس الروقان!!ـ
و طبعا موضوع السنكوتشات الجامده من شبراوي الحسين ده موضوع تاني خالص .. مذاق مختلف.. الذ الذ الذ..!!ـ
كل ده تمام جدا.. انما الموضوع الاهم من ده كله بقى و اللي ريكا محبتش تسترسل فيه الا لما جادو اللمض زن عليها.. هو موضوع الدكتور.. ده بقى الفيلم الكبير بجد.. لا انا كنت هاروح اصلا و لا كنت هاخدها معايا ولا كان في اي حاجه من دي هاتحصل من اساسه .. بس ماتفهمش ايه اللي غير كل الخطط في اخر لحظه و لغيت معادي و قررت اروح للدكتور و اصريت ان محدش يجي معايا من اهلي و ان رشا هي اللي هاتيجي معايا .. رغم اننا كنا بنتكلم قبل الفطار ولا جت سيرة الموضوع ولا اتفقنا على حاجه.. و فعلا كلمتها و هانروح .. خلاص اوك.. وروحنا للدكتور.. واول مادخلنا.. و بدون اي مقدمات.. لقيته بيقولي .. اوعي تفرطي في حقك يا بنتي!!ـ
وانا يا جدعان اخدت الكلمه و مش فاهمه حاجه و كل اللي طلع علي ابصلها و تبصلي و منبهرين بالجمله.. اه مش فاهمين بيقولها ليه لسه .. بس لما تحس ان حاجه بتنور قدامك فجأة و لما تحس ان قلبك بيتفتح فجأة بتبقى مركز اوي ومستعد لتلقي اي رسايل وكأن نظافة الدماغ حطت عليك من حيث لا تحتسب على رأيها!!ـ
كمل الراجل الطيب كلامه و فهمنا قصده ايه بالجمله و للحظه كنت هاحس ان الحدوته في خيالي واني باتلكك علشان افهم اللي انا عايزه افهمه مش اللي هو عايز يقوله.. انما ربنا كان ليه حكمه تانيه.. و الراجل كمل و حكالنا حكايه عن شغله هو و كأننا قرايبه اللي رجعوا من السنغال بعد غربة سنين وواحشينه.. ويحكي و يتكلم .. في الاخر كانت الخلاصه انه فهم و عايزنا نفهم ان ربنا زي ما بيحاسب الظالم على ظلمه بيحاسب المظلوم اللي بيسمح و بيستسلم للظلم ده بدون مقاومه.. وقال جمله حلوه اوي.. قال لو اتظلمت حاول ترد الظلم ولو ماقدرتش تبقى عملت اللي عليك قدام نفسك و قدام ربنا..!ـ
و بعد ماسرحنا بالكلام بعيد عن النقطه الاولانيه .. فجأة تاني و بدون مقدمات سالني سؤال مباشر و قالي مش عايزاعرف تفاصيل بس من جوابك المختصر هافهم.. وفعلا جوابي كان مختصر و رده كان مباشر و جميل و فيه كلام مهم جدا .. مهم اننا نحاول بس من غير مانظلم نفسنا.. مهم اننا ناخد القرار و نتحمل مسئوليته.. مهم اننا نواجه و مانضحكش على نفسنا.. مهم عمرنا مايضعش في وهم كبير .. و الاهم من كل ده القرب من ربنا .. لانه هو اللي دايما عنده الحل..!ـ
و طبعا مش هاقدر اقول القصه اللي حكاهالنا لانها حاجه تخصه انما هاقول انه قاللي قبل مايحكيها.. انا مش قصدي اسخنك و لا عايزك تفهمي من القصة دي اني باوجهك لقرار محدد انما اللي هاتفهميه منها لازم تاخديه في الاعتبار .. وفعلا حكى قصه مؤلمه و بقيت ابص لرشا و تبصلي.. هي عنيها تدمع وانا جسمي يقشعر و حالتنا بقت حاله من كتر ماحنا مش قادرين نفهم و لا نستوعب ازاي و ليه احنا هنا و بنسمع الكلام ده..!ـ
في نهاية القصة وصلنا لنقطة مهمه و هي ان الامور بتزيد صعوبه مع الوقت مش بتقل خصوصا لو كانت البدايه غلط من الاول.. و ان البني ادم عمره امانه في ايده حرام تضيع منه.. وانها لو ضاعت منه يبقى هو المسئول الاول عن الضياع ده و ان ربنا هايحاسبه هو قبل اي حد تاني..!ـ
خرجنا من عند الدكتور في حالة ذهول وفضلنا واقفين عالباب شويه بنحاول نفهم و نستوعب الموقف من اوله.. قمة التعجب و قمة السعادة.. فعلا احساس غريب جدا انك تحس ان في حد جايلك او انت اللي جايله.. بتقابله لاول مره و بيكلمك لاول مره و يقولك كلام كأنه عايش معاك و عارف عنك كل حاجه.. احساس غريب جدا انك تحس ان باب انفتح فدامك.. طاقة نور.. اشارة مرور.. وكأنك عيل تايه لقاه واحد طيب ووصله لباب بيته..!!ـ
سبحانك يا رب ما اكرمك..!ـ
Sunday, October 08, 2006
هو ليه محدش بيسيب حد في حاله؟؟
ليه كل واحد مايحطش همه في نفسه و يتشغل باللي يخصه!!؟؟
ليه في ناس متصوره ان من حقها تسيطر على الاخرين او على الاقل تتدخل في حياتهم و في قراراتهم و في
طريقة تفكيرهم و لو قدروا كمان في احلامهم!!!؟
ليه دايما في حد متصور انه الكبير العاقل و الباقي عيال مهابيل.. ولو دورت عليه تلاقيه محتاج شهادة
معاملة اطفال من عمايله السودا..!!!؟
ليه دايما في حد بيسخن من تحت لتحت.. عامل ساكت و نسمه وهو نار قايده ياويل اللي تمسك فيه!!؟
ليه دايما في ناس متصوره انها عارفه الاحسن لك و الافيدلك.. ده على اعتبار انك عبيط مش عارف يا عيني انت حاسس بايه ولا نفسك في ولا بتفكر في ايه!!؟
ليه دايما لما تشتكي من حاجه يطلعلك الف صوت يقول معلش استحمل ماحنا كلنا تعبانين و قرفانين.. وكأن الاصل في الحياه ان الكل يكون مش مرتاح!!؟
ليه دايما لما تاخد قرار بالتغيير اللي نفسك فيه و حاسس انه هايريحك تلاقي حيطه سد بينك و بينه من اقرب الناس ليك .. و كأن قرارك ده عيب في حقهم.. و خصوصا لو كان صح وهم ماقدروش ياخدوه قبلك!!؟
ليه لما ربنا يكون محلل لك حاجه الناس تحرمها عليك لمجرد انها مش هاتريحها هي او لانها مش هاتقدر تعمل زيك!!؟
ليييه..ـ!!؟
ليييييه..ـ!!!؟
Friday, October 06, 2006
يـــــــا رب..ـ
كم هو واسع بابك.. فاغفرلي و اقبلني على اعتابك..ـ
برغم كل ذنوبي و تقصيري اطمع في عفوك و رضاك..ـ
اطمع في عونك و هداك.. فلا ملجأ و لا منجى سواك..ـ
اللهم انك تعلم مابقلبي من الم و تعلم مابعقلي من حيرة و اضطراب..ـ
فاهدني برحمتك الى سبيلك و اهدني في امري الى الصواب..ـ
يـــــــــــــارب..ـ
في عز الضعف و الوحدة.. بادور على اللي يسندني.. بادور على اللي ياخد بايدي.. يفهمني.. يساعدني.. والاقي ساعات صديق و اتنين.. و اتكلم و ابكي و اتالم.. يحسوني.. يشاركوني.. يحاولوا كمان يساعدوني.. و مره في مره.. احس ان الكلام ماسخ.. و ان الحزن شيء بايخ.. مالوش لازمه يطال الكل.. خصوصا ان مهما نقول ومهما نعيد.. مافيش حاجه بكلام تنحل.. و باسكت وانكتم خالص.. واقول الكل مش ناقص.. و الف وادور مع الافكار.. وتملكني في ليل و نهار.. وتزداد الهموم وانهار.. و من تقصيري مع ربي باكون مسكوفه ادعيلي.. و اقوله يا رب قويني دانا مهدود هنا حيلي.. و صبرني و قدرني.. وقصر بالنهار ليلي.. و احس في لحظه انه كريم.. وكرمه كمان مالوهش حدود.. مالوش لازمه اتوه و احتار و ربي اللي خلق موجود.. و افكر عايزه ادعي بايه.. وادور عالكلام مالاقيه.. و في الاخر و بعد الغلب لما يطول.. الاقي حاجه جوه القلب طالعه تقول..ـ
يــــــــــــــــــــارب..ـ
انت العالم بحالي.. و الغني عن سؤالي..ـ
يــــــــــارب
Wednesday, October 04, 2006
غريبه جدا قدرة الانسان على الحب.. و الاغرب قدرته على عدم الحب!!ـ
و الاغرب و الاغرب هو الانسان نفسه.. اللي فاكر عمره ملكه.. يلملمه و يبعتره.. و في الاحزان يضيعه..
بأي حق؟؟
بأي حق.. تضيع الايام و الاحلام.. بأي حق تقضي عمرك في الاوهام.. مين قالك انك جامد كده!!؟ مين قالك انك ممكن تعيش بالشكل ده!؟ مين فهمك كده او قصدي مين اللي ضحك عليك؟؟ انت؟؟
طز فيك!!!ـ
طز فيَ و طز فيك.. طز في اي شيء يربطني بيك.. لو مش سعيده معاك.. لو مش لاقيه نفسي فيك..ـ
طز فيَ و طز فيك.. لو هاتفضل انت انت.. عمري يوم ماهاحن ليك..ـ
ازاي تكون حاببني و انا مش حاسه بيك..ـ
ازاي اكمل عمري ادور عالحنان اللي في عينيك..ـ
ازاي عايزني اكدب نفسي واصدقك..!ـ
مش قادره احسك.. يبقي قوللي ازاي احبك و اعشقك!!ـ
انا برضه زيك.. ماليش الحق.. اني اعيش الوهم و اخدع نفسي و اخدعك.. و انام و اقوم على كدبه باقنع نفسي بيها عشان ترتاح انت و غيرك..ـ
بأي حق اقول باحبك.. و انا مش باحبك..ـ
بأي حق اعيش الكدبه علشانك.. واكدب علي و اصدقك..ـ
بأي حق!!؟
Tuesday, October 03, 2006
مصر حلوه اوي من الطياره يا جماعه.. طبعا الاشرار منكم هايقولوا ايوه هي حلوه بس من فوق انما من تحت عينك ماتشوف الا النور.. بس صدقوني.. حتى النور في مصر مختلف.. من فوق او من تحت!!ـ
بعد اطول رحله قضيتها في حياتي.. شركة طيران اي كلام و طيارة نص عمر.. وسواق ميكروباص سابق ماسابش مطب في الهوا الا و لبس فيه.. واربع ساعات ترانزيت مع صيام و عطش و فطار على ميه و بسكوت.. بابص من الشباك.. لقيت مصر.. اخيراااااا !!ـ
بجد مش هزار.. مصر غير.. انوارها غير.. حتى من فوق في السما بتحس الحياة في البلد.. بتشوف النيل و المراكب..البرج و الاوبرا وكوبري قصر النيل.. و الانوار تشق الارض شوارع.. عواميد نور و عربيات.. و بيوت و اعلانات.. و المأّذن.. بتفهم وانت فوق يعني ايه بلد الالف مئذنه!! بين الشوارع و في قلب البيوت.. في كل شارع من كل حي.. مأذن خضرا طايله السحاب.. و كأنهم زرع اللبلاب.. فارد خضاره عالحيطان.. رباني يطرح.. وان طرح صعب يموت!!ـ
و كله كوم و فرحة اللقا في المطار كوم تاني.. كاني مت و عشت من تاني!! كل العيون متعلقه بالبوابات.. بتحس و انت خارج من المطار ان كل الناس دي مستنياك.. نفسك تسلم على كل اب و تحضن كل ام.. و تحس انك امل بقرب لقاهم باحبابهم!!ـ
في الطريق للبيت.. كل مكان ليه ذكريات.. بتفكرني بحاجه حصلت في وقت فات.. طول الطريق و انا حاسه روحي بره الشباك.. و عنيا تتلفت يمين و شمال.. و ساعات تدمع و تضحك ساعات!!ـ
نفسك في ايه ؟
دلوقتي حالا.. سندوتش فول بالبسطرمه و شوية طرشي!!
دلوقتي!!؟
اه دلوقتي.... ليه لأ.. مالدنيا صاحيه و الحياه مالهاش حدود..ليه لأ.. مادام العيش موجود و الفول موجود!!ـ
و دي كانت اول مره اتسحر من اول رمضان..!ـ
اول يوم احس ان اصلا في رمضان..!ـ
دلوقتي بس اقدر اقول بقلب جامد.. كل سنة و انتم طيبين و رمضان كريم!!!ـ
من مصر..
<<Home
