بـاحـلم علـــى قـدّي....ـ

Sunday, November 26, 2006

لتاني مره في اقل من اسبوع يشدني جدا برنامج العاشرة مساءا في فقرة عن مجموعه من الاطفال المصريين سنهم من سته لحد تلتاشر سنه اشتركوا في مسابقه عالميه بتقيمها مؤسسه ماليزيه اسمها "يو سي ماس" ـ

طبعا الاسم ده ممكن يكون معروف بالنسبه لكتير من الامهات اللي ليهم اطفال في السن ده و خصوصا اللي اولادهم في مدارس خاصه لانها و باختصار كانت زي موضه في الفتره اللي فاتت..ـ

وعلى عكس التوقعات تحولت ظاهرة اليو سي ماس اللي هي في الاصل عباره عن طريقة بتعلم الاطفال تنفيذ عمليات حسابيه كبيره بدون استخدام الاله الحاسبه من مجرد موضه الى حاله ملموسه من التقدم في مستوى الطلبه اللي بيدرسوها..ـ

و فكرتها كلها معتمده على عداد الارقام اللي كان عندنا كلنا و احنا صغيرين .. لكن السيد الماليزي صاحب النظريه دي طور العداد و اخترع طريقه معينه للتعامل معاه و الحساب عليه في البدايه و بعد فتره من التعليم بتبدأ المرحله التانيه و هي الحساب بالتخيل يعني من غير العداد..ـ

الطفل بيتعلم يتخيل العداد في دماغه و بيتعامل بصوابعه في الهوا كانه بيحرك الكور على العداد..!ـ

فكره غريبه و هايله انتشرت بقوه في العالم في السنين الاخيره و في مصر في اخر سنتين تقريبا.. ولاول مره بتشترك مصر في مسابقة اذكى اطفال العالم اللي بتنظمها المؤسسه دي في ماليزيا..ـ

المسابقه بتقسم الاطفال المشتركين حسب مراحلهم العمريه الى مجموعات بيختلف على اساسها عدد الاسئله لكن في نفس الوقت..ـ

يعني المجموعه الاصغر بتحل مية مسئله حسابيه في تمن دقايق و المجموعه الاكبر بتحل ميتين مسئله في التمن دقايق!!ـ

طبعا اللي شاف الحلقه اكيد كان هاينبهر بالاطفال و جمالهم و صغر سنهم.. مجموعة الاطفال دول سافروا ماليزيا علشان ينالوا شرف الاشتراك او التمثيل المشرف لمصر و ده كان اقصى امال المشرفه عن المجموعه زي ماهي قالت ..ـ

لكن اللي يبهر اكتر و اكتر هو ان رابع اسم اعلنوه فائز في المسابقه كان اسم البنوته الصغيره بيريهان و بعدها توالت اسماء البعثه المصريه ووصلوا في الاخر لانهم رجعوا مصر معاهم تمن جوايز لتمن مركز متقدمه جدا في مسابقة اذكى اطفال العالم!!ـ

وبغض النظر عن ان المراكز الاولى كانت من نصيب ماليزيا و الهند الا ان وجود اطفالنا في المنافسه دي و سط اطفال من كل دول العالم ووصولهم للمراكز دي و ثقتهم الهايله بنفسهم و بقدراتهم و تقبلهم بكل بساطه لتحدي منى الشاذلي ليهم و للمسائل اللي كانت محضراها مع فريق الاعداد و اللي بمنتهى الصراحه كانت تستلزم من اشطر واحد فينا على الاقل عشر دقايق على مايكتب ارقامها على الاله الحاسبه اصلا و السرعه الرهيبه اللي كانوا بيجاوبوا بيها صح كانت مذهله ماشاء الله..ـ

و هي زيي بالضبط كل اللي قدرت تقوله انها مش قادره تصدق!!ـ

و لتاني مره في اقل من اسبوع احس ان في امل و ان فعلا مصر ولاده يا منعم.. الطفل المصري فيه امل كبير يا جماعه.. مهما كان الشكل السائد او المنتشر بيقول غير كده انما الحقيقه لأ.. الحقيقه ان الطفل المصري بجد من اذكى اطفال العالم ايوه الدراسه بتقول انه بيكون ذكي لحد ست سنين انما الولاد دول اكبر دليل على انه محتاج شوية اهتمام و تنميه للذكاء ده و هانلاقيه يحافظ على مستواه و يزيد و جيل بعد جيل.. يبقى عندنا اكتر من باز و اكتر من زويل..ـ

علشان كده هاقول ان زي ما بكره مسئولية اطفالنا..ـ

هم النهارده مسئوليتنا احنا..ـ

زي ما هانربيهم هايطلعوا وزي ما هانعلمهم هاينبغوا..ـ

(12) comments

الملك..ـ

Friday, November 24, 2006

لولا فرح ريكا امبارح.. كنت هاكتب بوست مختلف تماما.. كان مأثر في جدا حوار الملك - زي ما بيسموه طلبته و زملاؤه في امريكا- د. فاروق الباز مع منى الشاذلي على قناة دريم..ـ

ومهما كان جوايا كلام كبير عايزه اقوله و اصيغه صح جدا علشان يوصل المعاني اللي حسيتها..ـ

الا اني بعد ما سمعته و شفت اد ايه هو انسان بسيط و سلس في كلامه حسيت ان البوست اللي يتكتب عنه لازم يبقى على نفس القدر من البساطه و الجمال..ـ

تحس وانت بتسمعه انه عمك او خالك.. حد قريب اوي..ـ

و تلاحظ انه طول الحوار ماقالش غير كلمه انجليزي واحده.. طلعت منه بصوت واطي كانه بيكلم نفسه .. ابسوليوتلي..!!ـ

و على العكس كلامه كله بسيط و في قمة التواضع.. رغم كل العلم اللي جواه و اللي بيشع من عينيه بشكل ملحوظ ماشاء الله.. و دي كانت اول حاجه لفتت انتباهي في الحوار..ـ

بعد كده ابتدى يتكلم عن رحلته مع ناسا و ازاي دخلها و ازاي علم نفسه بنفسه لحد ما وصل لانه يبقى رئيس فريق الجيولوجيين فيها و اكبر خبير في جيولوجيا القمر!!ـ

تصوروا ان الراجل ده بكل علمه ده و كل جهده ده.. يوم لما حب يطمن فريق ابولو اللي كانوا هايطلعوا القمر

على المركبه الجديده المطوره و اللي كانوا قلقانين جدا منها لان احتمالات اعطالها اكبر بكتير من كل اللي سبقوها..ـ

قاللهم انا هاديكم ورقة مكتوب عليها فاتحة القرآن الكريم و هي هاتحفظكم..!ـ

و من شدة قناعته هم كمان اقتنعوا و صدقوا انها هاتحفظهم.. وفعلا ربنا اراد انه ينصره و رجعوا بخير..ـ

ازاي كمان كان السبب في اول رساله عربيه تتذاع على العالم كله من القمر لما علم رائد الفضاء جمله عربي

يلقي بيها السلام على اهل الارض من القمر و اتفق معاه انه يقولها من فوق و فعلا حصل كده وسط دهشة كل الحاضرين!!ـ

الراجل ده برضه كان السبب في وجود ستاشر "ستة عشر" اسم من اسماء علماء العرب المسلمين على كل خرايط القمر المعترف بيها عالميا..ـ

زي الخوارزمي و ابن حيان و غيرهم.. لانه كان كل ما يكتشف موقع هبوط جديد على سطح القمر كان يسجله باسم واحد من العلماء دول!!ـ

و غيره و غيره من الانجازات و الافكار بره مصر و جواها اللي تخلي الواحد يسعد و يفتخر ان في واحد مصري بالمواصفات دي..ـ

اخر حاجه عايزه اقولها عن لسانه .. هم النقطتين المهمين اللي استفادهم جدا في حياته العمليه..ـ

اولهم ان اللي ما يعرفش يوصل علمه للاخرين و ينفعهم بيه فلا نفع في علمه.. و دي حكمه اتعلمها عن والده و عمل بيها طول حياته..ـ

و تاني حاجه كانت جمله قالها كبير رؤساء وكالة ناسا في اول اجتماع ليه مع رؤساء الاقسام في الوكاله

اللي كان فيهم فاروق الباز كرئيس لفريق الجيولوجيا "واللي كانوا بالمناسبه كلهم اكبر منه في السن"

ان كل واحد منهم مسئول عن فريقه وانه لو طلع من كل واحد بيشتغل تحت ايده اقصى ما يستطيع و يتصور انه يقدر يعمل..ـ

يبقى ده يعتبر فشل زريع..ـ

انما النجاح هو ان القائد يطلع من كل واحد في فريقه حاجات هو نفسه ماكانش متخيل انه يقدر يعملها ولا حتى يفكر فيها!!!ـ

دروس مهمه جدا اتعلمتها من الراجل ده في الحلقه القصيره دي.. وكان نفسي كل الشباب يشوفوها و يسمعوا الكلام ده منه..ـ

و نتعلم كلنا ان طريق النجاح عمره ماكان في سهولة طريق اسكندريه الصحراوي بالعكس.. هو طريق صعب و طويل .. محتاج طموح ومجهود و تركيز على الهدف و تفاني لتحقيقه..ـ

لان فاروق الباز اللي احنا كلنا بنفخر بيه لو ماكانش تميز في كل الحاجات دي .. ماكانش عمره هايزيد عن اي مدرس كيميا في اي مدرسه ثانوي..ـ

و هنا بجد الاختلاف!!ـ

(19) comments

MABROOOOK

Thursday, November 23, 2006

tonight am celebrating my sister

RIKAAAAAAAAAAAAAAAA..

and i wanna say that alf mabrook is not enough..

for all what u've been through.. for all u've seen and suffered..

u deserve a million mabroooooooooooooooooooooooooooooook...

am really happy for u.. rbbena yesle7lek 7alek ya rika yebent 2alby.. :o)))))))

(12) comments

وشوش البشر

Monday, November 20, 2006

وشوش البشر زي البيوت..ـ

منها اللي قلبك ينشرحله وتحبه موت..ـ

و منها اللي ممكن يقبضك..ـ

لا فيه تعيش.. و لا بسلام تقدر تموت!!ـ

وشوش خشب فيها العيون شبابيك..ـ

ازاز في ازاز و الستاير مسدولين قدام عينيك..ـ

لانت شايف ايه جواه..ـ

ولا انت عارف مين من وراه بيبص عليك!!ـ

وشوش ووشوش نشوف كل يوم..ـ

لو يوم فيه شمس.. او فيه غيوم..ـ

كل الوشوش في الزحمه تشبه بعضها.. مع انها..ـ

فيها اللي يفرح.. و فيها اللي يملاك بالهموم!!ـ

(4) comments

نوبة صحيااااااان..!ـ

Sunday, November 19, 2006

مش عارفه ليه البنات مالهمش جيش..!! مش شايفاها حاجه وحشه بصراحه..ـ

ولا تتنافى مع الانوثه في شيئ.. بالعكس.. يمكن تكون بقت ضروره من ضروريات الخروج للشارع اليومين دول!!ـ

ايه اللي جاب سيرة الجيش هنا..!!؟

انا كنت هاتكلم بس عن حكاية نوبة الصحيان.. تعبير لطيف اوي.. اتقاللي قريب من اكتر من حد..ـ

حاسين انك في نوبة صحيان.. ولما فكرت في المعنى لقيته حقيقي.. و حلو..ـ

احساس البوق اللي بيزعق وش الصبح.. ممكن يكون مزعج بس مفيد.. كله لازم يصحى و يدي التمام.. انه فاق و فهم.. ان في يوم جديد بيبتدي..!!ـ

فعلا انا في نوبة صحيان.. حاسه ان في حاجه جوايا بتزعق بعزم مافيها.. كده كفايه.. كفايه نوم في العسل.. آن الاوان تصحي..ـ

آن الاوان لنقطة نظام..ـ

آن الاوان للاحترام.. انتي و مشاعرك.. انتي و مواقفك.. و حتى انتي و الكلام!!ـ

اليوم ده مش لازم يفوت.. ماتولدش بالساهل علشان في لحظه يموت..ـ

لازم نقف.. ونفكر و نعرف..ـ

امبارح ده كان ايه؟؟ شايفينه غلط ليه؟؟ ليه غضبانين منه و متمردين عليه!!؟

و النهار ده اللي جاي.. عايزينه يبقى ازاي؟؟

عايزين نحب بجد.. ولا نقول الكلام..؟

عايزين نعيش مع حد.. ولا نعيش و السلام..؟

ممكن يكون ده متعب.. ولا يكون مستحيل.. بس المهم نحاول.. نعيش يومنا جميل..ـ

(9) comments

تستااااهل

Wednesday, November 15, 2006

مجنناني اوي فكرة البشر اللي عايشه سفلقه على حساب مشاعر البشر التانيين..ـ

حاله من الاستغلال الغير مبرر.. او لأ.. هو مبرر بالنسبالهم طبعا.. بانه حق و انه مش وحش..ـ

ومش بيضراو انها طيبه لانهم خايفين عليهم و عارفين مصلحتهم اكتر منهم و الكلام اللي رايح مش راجع ده!!ـ

هم طبعا مش شايفين ان ده نوع من انواع الاستغلال للمشاعر.. او ممكن شايفين بس مش فاهمين ان ده بيتحول مع التكرار لحالة ابتزاز عاطفي..ـ

او يمكن فاهمين و قاصدين انهم يشكلوا ضغط غير مباشر علشان يحققوا هدف معين حلو او وحش..ـ

مش مهم.. المهم انهم يعملوا اللي هم عايزينه و اللي هايريحهم.. على حساب اي حاجه تانيه.. حتى لو كانت الحاجه دي هي مشاعر و اعصاب بشر..!ـ

الحاجه اللي مجنناني اكتر بقى هي البشر الاولانيين .. اللي بيسمحوا للبشر التانيين انهم يعملوا فيهم كده..ـ

ركزوا معايا علشان بقى في بشر كتير في البوست ده!!ـ

يعني فكرة ان حد يجي يقولك اعمل كذا..ـ

فاتقوله لأ مش عايز..!ـ

ليه مش عايز؟؟

علشان كذا و كذا و كمان كذا!!ـ

يااااااااه كل دي اسباب.. طيب خلاص براحتك..ـ

و بعد خمس ثواني و نص تلاقيه لف لفه و رجع تاني..ـ

طب ماتجرب تعمله بس.. مش هاتخسر حاجه..ـ

لا يا سيدي هاخسر.. وبعدين انا اصلا مش عايز.. اجرب ليه!!ـ

طب علشان خاطري.. انا ماليش خاطر عندك!!؟

ليك طبعا.. بس انا مش عايز!!ـ

يا ستااااااااار.. ايه القسوه دي.. مافيش قلب ولا احساس.. خلاص عنك ماعملت.. اتفلق!!!!ـ

بعد سبع ثواني وربع بقى .. تلاقيه جي و جايب امة لا اله الا الله علشان تشهد الموقف الجلل

اللي هايحصل و تشوف اد ايييييييه انت متحجر القلب و اعمى البصر و البصيره ومش عايز

و مصر انك مش عايز تعمل الحاجه اللي انت مش عايزها من الاول و اللي هو عايزك تعملها!!ـ

ها.. راجعت نفسك.. انا مش عايزك تعمل حاجه غصب عنك..ـ

شكرا .. وانا كمان مش عايز اعمل حاجه غصب عني..ـ

طبعا ماختلفناش.. مانت هاتعملها بمزاجك!!ـ

تاااااااني يا رستم!!ـ

ايوه طبعا تاني و رابع و عاشر.. و بعدين مش عاملي خاطر.. اعمل حساب للناس اللي جايه تتفرج دي.. ولا هو مافيش دم خالص..ـ

لا ازاي خاطركم على دماغي كلكم..ـ

طيب مانت كويس اهو.. ربنا يهديك..ايوه كده.. على الاقل قدامهم ماتحرجنيش.. قول هاعمل و بعدين ابقى اعمل اللي انت عايزه.. دانا باحبك و خايف عليييك.. ماتتعبش قلبي..ـ

طب ولو مارتحتش او ماعرفتش..!!؟

خلااااااااص ساعتها محدش يقدر يقولك حاجه طبعااااااا.. هي الدنيا بالعافيه ولا ايه!!؟

لا ابدا مش بالعافيه ولا حاجه.. خلاص حاضر انا هاعمل اللي انت عايزه بس على سبيل التجربه.. و علشان خاطرك..ـ

لا علشان خاطري ايه.. علشان انا بحبك و خايف عليك.. هو انا هاستفيد ايه يعني.. ماهو كله ليك.. آآآآه قلبي.. آآآآه الضغط علي.. آآآآآآه السكر وطي..!ـ

الف سلامه عليك.. خلاص ماترهقش نفسك..ـ

هو في حد هايحبك قدي..؟

لا طبعا..ـ

حد هايخاف عليك اكتر مني..؟

لا برضه..ـ

طيب خلاص.. اتفقنا..ـ

حاضر...!ـ

طيب انا قايم نازل مشوار عالسريع.. و بعد كده رايح النادي مع اصحابي هانلف التراك و نديها ماتشين تنس و مش هاتأخر..!!!!!!ـ

و تروح ايام وتيجي ايام.. و نلاقي في يوم حد قاعد بيصوت.. انا ازاي عملت في نفسي كده.. ازاي وافقتكم..ـ

ازاي .. ازاي!!ـ

و بعدين بقــــــــــــى.. بلاش دوشه هو حد كان ضربك على ايدك.. ولا احنا يعني كنا غصبناك على حاجه..ـ

ايه البلاوي اللي بتتحدف دي!!ـ

اسخف حاجه بتجنني انا بقى في السيناريو ده لسه ماجتش..ـ

هاتيجي مع اول موقف مشابه يتكرر بين نفس الطرفين او بين طرف تالت شاف اللي حصل اول مره وفهم ان فلان ده بيجي كده..ـ

لما نضغط على زرايره دي.. هاينور و يقول بابا وماما.. و يمكن يعمل عجين الفلاحه كمان..ـ

و الاسخف و الاسخف لما يتكرر الموقف تالت ورابع و تلاقي فلان ده بيكرر نفس الغلط وبيعمل نفس الخطوات... و كأنك يابو زيت ماقليت!!ـ

تاني .. انت تاني.. و ترجع تعيط في الاخر.. طز فيك بقى مانت اللي مش عايز تفهم..ـ

ولا المصيبه لا تكون فاهم و بتضحك على نفسك!!ـ

يعني مش كفايه هم بيستكردوك و بيضحكوا عليك.. لا وانت كمان سايق فيها.. عامل عبيط..ـ

ولا تكون فاكر نفسك شهيد..!!؟

ولا بتقنع نفسك انك بتعمل كده بمزاجك مش غصب عنك؟!!؟

لا دانت لو كده تبقى عبيط بجد!!ـ

انت بتبررها لنفسك؟ بتريح اعصابك مش كده؟؟

مش باعمل حاجه غصب عني.. انا باعمل كده علشان انا عايز اعمل كده..ـ

كدددددااااااااااب!! ماتبصليش كده.. ايوه كداب و ستين كداب.. بتكدب على نفسك مش عليا..!ـ

ليه بس..!ـ

علشان بتسمح لحد انه يستغلك.. يستغل مشاعرك واحساسك.. يعدي عليك ويدوس اوي..ـ

وعلشان ماترجعش تلومه بيخليك تقنع نفسك انك بتعمل كده من نفسك علشان انت طيب و حنين.. وانت زي العبيط يا حنين..ـ

بتوهم نفسك انك بتعمل ده علشان انت عايز كده.. مش غصب عنك ولا مش مقتنع لا سمح الله!!ـ

انا كل ده..ـ

انت اكتر من كده.. ولو فضلت كده.. مالكش عندي غير كلمه واحده.. تستااااااااااااااااااااااااااااهل..ـ

(15) comments

BREAK THE CHAIN..

Thursday, November 09, 2006

lately i had those talks with some friends.. in every talk i end up saying

the same thing .. "we should break the chain"..

yes.. its the conclusion i reached after those long crying and thinking, laughing and thinking..

talking and thinking days and nights...

how come we always repeat our mistakes.. ironically the same way.. same steps every day..

as if we never learn enything in this life .. as if we never got hurt..

as if those scars r painless..!!

how come we pretend to be that strong and self controling if we cant help making the same moves in every game..

r we that typical helpless mind and soule.. r we that fake!!?

its really more like those chain reactions we studied once in college..

1+2 leads to 3.. 3+4 leads to 5.. and so on..!

u just need to start it.. light the first flame and leave it to the wind to make the fire...

little of u + little of them leads to the same mistake.. same pain.. and so on!!

we usually do that unconsciously or may be we pretend we r not aware that we r repeating ourselvs..

maybe once.. or twice.. and maybe three times.. i can buy that.. but not any more..

please.. dont convence me that u didnt notice the stupidity u r acting with in every single time!!

sorry.. but thats bullshit!!

so if we agreed on that chain reaction idea.. then i guess its logic to break the chain

once in a life time.. to stop that series of mistakes we r staring..

it doesnt do us any good to say we cant do anything.. we cant change a thing.. it just happens.. we had to.... another bullshit!!

just confess it please.. we owe it to ourselves.. just admit we took the easy way..

just admit we didnt fight enough.. just admit we let them win..

and am not saying that we should win every battle, no am just saying..

fight it decently for god sake!!

try to stop for a minute or two before eache step..

and try to remember if u saw that move before or not, if u did it before or not.. if it turned to be a mistake or not....

and if yes.. please dont go on.. dont take the same step.. dont make the same mistake..

please break the chain..

(18) comments

كنت هاكتب!!ـ

Wednesday, November 08, 2006

كنت هاكتب بوست جديد ورجعت ف كلامي.. بكره بقى!!ـ

(6) comments

<<Home