<<Home
Sunday, December 31, 2006
دا عيد غرييييييب!!ـ
من اوله و هو زي مايكون ماشي بالعكس.. اول مره اخرج ليلة العيد.. اينعم ريكا فاتها حوالي خمس سنين و نص من عمرها.. مش بس علشان ماخرجتش معايا انما كمان علشان فاتتها حته نتفة حفله لشوية شباب ماليانين فن وجمال.. يحسسوك من اول العرض ان لسه في امل.. ان في جيل بيفهم جي في الطريق.. وان الدنيا مش سوده اوي.. دي فيها سقطه نور جي من بعيييييييييييييد.. زي شمس الشتا.. بردانه بس طالعه اكيد!!ـ
كلهم صغيرين.. اكبر مافيهم اول الحاجه و عشرين.. تقريبا كلهم ولاد ناس فنانين.. احمد فؤاد حداد.. عمر بهاء جاهين.. آيه محمود حميده.. واحمد علي الحجار.. و حفيد الموجي و اتنين كمان مش معروفين.. مش القضيه هم ولاد مين.. بس الحكايه انهم بجد موهوبين.. يمكن ابن الوز عوام دي حقيقه.. وحفيد الوز عوام برضه حقيقه..ـ
قالوا كلام في الصميم.. قالوه عالمكشوف و عالمتغطي.. و اللي عايز يشوف من الغربال مش لازم يجيب منظار.. بس يفتح ودانه و يفهم الكلام.. يسمع بقلبه و يشغل الترس اللي صدى فوق كتافه.. هم عاشوا التجربه.. حسوا وشافوا.. وقالوا اللي حسوه بعزم ما فيهم.. على اد ماطالت ايديهم.. على اد ما ماليهم وجعهم وهم يادوبك لسه في اللفه.. لاجم ولا راحوا.. لا كبروا دماغهم و لا عرفوا يرتاحوا.. لا قالوا نطلع بره و لا قالوا و انا مالي.. خلليني انا في حالي.. انما بالعكس.. قالوا صباح الورد.. على كل جوز او فرد.. على الامل يتمد.. على بكره فجره يشد.. كل اللي بات في الحبس.. قالوا مانيش ارهابي.. لو دقني طولانه او باقرا في كتابي.. نص البشر اهلي و الباقي اصحابي.. لو حتى باعرف اطير او بادرس الذره.. عمري مافكر اخون و لا ابيع هنا لبره.. لو شكلي مش عاجبك..طز في جناب حاجبك.. اللي اترفع بيبص!!ـ
قالوا كلام و كلام.. و كأنهم حاسين.. باللي هايحصل بكره.. وكأنهم شايفين المشنقه والالف عشماوي.. دايرين يقولوا حكاوي.. عن بيت واهل و ناس.. عن البشر تنداس.. وقال ايه بقت حره..!ـ
ايوه ماكانش ملاك و لا عمري حبيته.. ولو كان شافيز او كاسترو كنت زعلت و بكيته.. بس اللي واجعني.. انه في الاخر انسان.. عربي مسلم.. مش احسن ولا اوحش من اي شيء تاني حكم في اي مكان.. ليه النهارده و ليه بالشكل ده نتهان.. و كأننا كلنا قررنا نضحي بيه ونوفر فلوس الخرفان.. و كأن السنه حلفت ماهي ماشيه غير لما تعلم على خدنا ذل و هوان.. حاسين بوجع القلب؟؟ حاسين بقطع اللسان؟؟
كفايه و نتعلم.. ولا لسه هانقول كمان؟؟؟
Friday, December 29, 2006
وحشتونييييييييييييييي..ـ
كل سنه وانتوا طيبين كلكم كلكم.. اللي بيجي هنا و اللي مش بيجي .. اللي بيسأل و اللي مش بيسأل.. اللي بيحبني و اللي مش بيحبني..ـ يلا عيد بقى.. او على رأي اللي بيقولوا تجمع اعياد!!ـ
الكريسماس و عيد الاضحى و راس السنه و عيد القيامه مش فاضل غير اعياد اليهود اللي ماجتش في نفس الوقت..! بس احسن ان شاء الله عمرهم ما يفرحوا..ـ
المهم يعني محدش ليه حجه.. المفروض كل الناس تبقى مبسوطه!!!ـ
وبغض النظر انا فعلا مبسوطه ولا لأ.. برضه المفروض اكون مبسوطه..ـ
ايوه في مشاكل بتتولد كل يوم..ـ
ايوه في سخافات لا تنقطع..ـ
ايوه متعلقه من رقبتي في الدنيا و مش طايله لا سما و لا ارض..ـ
و ايوه مستنيه فرج ربنا ورحمته و طمعانه انهم ما يتأخروش اكتر من كده حتى لو ماكنتش استحقهم...ـ
انما برضه المفروض اكون مبسوطه.. و ان شاء الله هاكون مبسوطه!!ـ
وان شاء الله هاخرج النهارده _لو ريشا ماباعتش القضيه_ و هاصلي العيد بكره.. و هاحضر الدبح.. و اعمل مشاوير التوزيع اللذيذه.. و اسمع دعوات تفرح.. و اقول امين.. و الدنيا هاتبقى زحمه و البيت هايتملي ناس .. سبت و حد و اتنين و هانزل الشغل التلات و انا مبسوطه جدا ان شاء الله..ـ
كل سنه و انتوا طيبين
Thursday, December 21, 2006
No.. i didnt mean its a very important Post...
i was talking about the well known VIP letters.. the very important person..
who really is the very important person?!?
that question occurred to me when i was on the way to work yesterday
and i caught a sticker on a car moving beside me printed with the doctor red crescent sign and the VIP letters!!
i wondered what kind of a VIP doctor is he?
is it just because he is a doctor???
doesnt he treat patients as other doctors?
may be he treats them in a special way??
and am sure hes not the health minister!!
after that i started thinking about the idea of considering urself a very important person
or even considering anyone else as one..
it came to my mind that we all can be very important people.... just if we knew what to do.. and how to do it!
isnt important means helpful and irreplaceable??
isnt it mean doing things to others they cant live with out?
so it means that this man over there cleaning the street is a very important person, that driver in the bus is very important, the girl helping in our house is a very important person, the teacher in her class, the nurse in the hospital, the doorman, the simple farmer and the plumber is a very important person as well..
all of them r very important.. if they just do their jobs the right way that makes them helpful and irreplaceable!!
ARE YOU A VIP??
Sunday, December 17, 2006
بقالي كام يوم عايزه اكتب و مش لاحقه.. عايزه اقول اني يمكن تعبانه اوي الحمد لله ويمكن مضغوطه جدا.. برضه الحمد لله .. بس الاهم اني اخيرا لقيت شغل الحمد للــــــــــــــــــــــــــه.. :ـ) ـ
ويمكن حكاية الشعل دي هي اكتر حاجه انا كنت محتاجاها و فعلا جت في وقتها .. حاسه انها حاجه صح ربنا يسرها علشان تعادل الحاجات الغلط اللي عماله ترف فوق نفوخي طول الوقت..!!ـ
المهم بقى دلوقتي الكلام يبقى بحساب و المقابلات بمواعيد الله يكرمكم علشان انا بجد مضغوطه جدا و معنديش وقت خالص..!!!!ـ
عايزاكوا تلموا بعض.. البنات في يوم والولاد في يوم و تعملوا كومنتات مع بعض علشان ارد عليهم كلهم مره واحده.. و ياريت لو ماردتش هنا تبعتولي عالفاكس :ـ) ـ
لا كلام جد بقى شويه.. انا مش عارفه اقولكم ازاي ربنا كرمني بالشغل ده في يوم و ليله سبحان الله.. كان موقف غريب جدا و حسيت انه ربنا ميسرهالي و مسيرني ليها بدون تفكير.. انترفيو و قرار تعيين بعدها بنص ساعه.. مكانتش متوقعه ابدا!! بس ربنا كريم الحمد لله.. وزي ما بيقولوا بيقطع من هنا و يوصل من هنا..ـ
الناس في الشغل لطاف الحمد لله ووقت الاذان الشركه كلها من رئيس مجلس الاداره لحد السعاه بتقف علشان الصلاه.. بتبقى حاجه جميله ماشاء الله.. ويمكن من اكتر الحاجات اللي مريحاني في المكان..ـ
اكيد هاحكيلكم تفاصيل تاني بعد كده بس الحقيقه مش قادره دلوقتي.. عايزه انااااااااااااااااااااام..ـ
تصبحوا على خير
Sunday, December 10, 2006
النهارده الصبح اخدت بالي ان بقالي كتير اوي ماكتبتش على الورق..بقالي فتره طويله
باكتب اون لاين على طول..!ـ
حسيت فجأه ان ريحة الحبر واحشاني..!!ـ
مافيش حاجه معينه عايزه اكتب عنها بس هاكتب الحاجات اللي على بالي دلوقتي..ـ
اول حاجه..ـ
كوشي.. القط المقطقط المزعج اللي عمال ينط على القلم وهو بيتحرك و شايف ضله على الورقه هايجننه..ـ
بيمد ايده مع كل سطر عايز يلمس الكلام زي مايكون هايقراه بطريقة برايل!!!ـ
تاني حاجه..ـ
كلام لقيته في اول البلوك نوت اللي باكتب فيه ده.. كلام كنت كتبته وانا في المترو في السويد
و افتكر اني حطيته عالبلوج وقتها.. كنت باقول فيه اني قررت اتعلم كل يوم حاجه جديده
علشان اكسر حاجز الاكتئاب المستمر اللي انا فيه على طول..ـ
يعني على اعتبار ان الاحتكاك المستمر و المباشر بشكل ايجابي بالاخر سواء كان اشخاص او اشياء ممكن يكسر حاجز الخوف
اللي برضه ممكن يكون نتيجه طبيعيه لحالة الرفض اللي اتكونت جوايا من انطباعاتي الاولى اللي غالبا ما بتكون صح الحمد لله..ـ
انما برضه .. المحاوله مطلوبه ومهمه.. يمكن يطلع احساسي غلط..!ـ
الظريف اني بعد ما قريت الكلام ده حسيت براحه غريبه.. حسيت زي ماكون باقرا شهاده بتقولي.. والله ماقصرتي..ـ
عملتي اللي عليكي و حاولتي.. ولا يكلف الله نفسا الا وسعها..ـ
ماتجلديش نفسك و ماتسمحيش لحد يحسسك انك قصرتي او فشلتي.. لو في حد فشل..ـ
يبقى الحمد لله مش انا..!!ـ
تالت حاجه..ـ
الوجع.. فكرة ان مرض السكر عامل زي الصديق.. تاخد بالك منه و تحترمه ياخد باله منك..ـ
تهمله و تستهبل يديلك بالجزمه..!ـ
الوجع برضه كده.. ايا كان سببه.. زي الصديق.. موجود دايما في حياتك.. بتشوفه او لأ ده موضوع تاني..ـ
بس هو دايما موجود في وعيك على رأي واحد صاحبنا مادايما بيقول!!ـ
فكرة التعايش مع الالم و الوجع دي فكره هايله اوي.. انك تتعامل معاه زي البطاقه..ـ
حاجه كده مالهاش لازمه بس ماتقدرش تمشي من غيرها..ـ
و في نفس الوقت حاجه قيمتها كبيره اوي بس لو حطيتها وسط محفظه مليانه ورق تاني ممكن تتوه و ماتحسش بيها!!ـ
رابع حاجه..ـ
باحب الشتا اوي و اموت في المطر..ـ
و افتكرت جمله كاتبها واحد صاحبنا تاني غير الاولاني بتقول انه بيجب يمشي في المطر علشان محدش ياخد باله انه بيعيط..!!ـ
انا برضه باحب امشي في المطر.. بس لو كنت باعيط.. اتمنى ان حد ياخد باله!!ـ
خامس حاجه..ـ
نفسي في كوباية شاي بلبن ومكسله اقوم اعملها..ـ
و كمان السيد كوشي المقطقط نايم على رجلي!!ـ
سادس حاجه..ـ
مهمه اوي سادس حاجه دي.. الريستارت!!ـ
حاسه ان انا باوضب دولابي.. او مكتبتي..!ـ
عارفين لما تيجي الايام اللي بنشيل فيها الصيفي و نحط الشتوي او العكس؟؟
عارفين لما تقوم في دماغنا نقلب المكتبه و نشوف ايه الزحمه اللي فيها دي و نجيب اللي هانقراه قدام و نرجع القديم اللي اتقرا ورا؟؟
طب عارفين اللحظه اللي بنمسك فيها المحفظه المكلبظه و نطلع كل اللي فيها و نبتدي نقطع الورق القديم و
الوصولات او الكروت اللي من سنة سيدنا عكروت و نرص من اول وجديد..ـ
الفلوس في مكان و الكروت في مكان و الصور في مكان.. ونحس انها بقت محفظه
بعد ماكانت شنطة سفر!!ـ
انا حاسه اني باعمل كل الحاجات دي جوايا دلوقتي!!!!ـ
سابع حاجه..ـ
و دي متعلقه بالحاجه اللي قبلها.. مش شرط ابدا واحنا بنوضب المحفظه نلاقي فلوس نحطها..ـ
علشان محدش يركز معايا في النقطه دي اوي.. اوك؟؟!؟
Sunday, December 10, 2006
I've been tagged by 7alolly elgameela...
The tag rules are:
1. Grab the book closest to you.
2. Open to page 123, scroll down to the 5th sentence
3. Post the text of next 3 sentences on your blog
4. Name of the book and the author
5. Tag 3 People.
so lets c what i have right beside me..
# first.. i dont know if Quraan counts or not, but i'll srart with it anyway..
الصفحة 123 في الجزء السادس.. سورة المائدة.. الاية الخامسة في الصفحة هي الاية 81 من السورة..ـ
وَلَوْ كَانُوا يُؤْمِنُونَ بِالله والنَّبِيِّ وَمَا أُنزِلَ إِلَيْهِ مَا اتَّخَذُوهُمْ أَوْلِيَاء وَلَـكِنَّ كَثِيراً مِّنْهُمْ فَاسِقُونَ * لَتَجِدَنَّ أَشَدَّ النَّاسِ عَدَاوَةً لِّلَّذِينَ آمَنُواْ الْيَهُودَ وَالَّذِينَ أَشْرَكُواْ وَلَتَجِدَنَّ أَقْرَبَهُمْ مَّوَدَّةً لِّلَّذِينَ آمَنُواْ الَّذِينَ قَالُوَاْ إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَاناً وَأَنَّهُمْ لاَ يَسْتَكْبِرُونَ * وَإِذَا سَمِعُواْ مَا أُنزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُواْ مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِينَ [المائدة : 83]ـ
# second will be a novel for Paulo Coelho "The Zahir"...
(I was just going through a difficult patch, experiencing the kind of misundererstanding that can occur in any love relationship. Esther was somewhere, waiting patiently for me to discover what had gone wrong in our marriage...)
thanx dear 7ala for that nice tag and for me i'll ask, mafeeshfayda , Hamede and sweet Summer to answer the same tag..
Wednesday, December 06, 2006
امبارح كنت في مشوار ظريف في مكاني المفضل في القاهرة.. الحسين.. مع اول دخولي لساحة الحسين لفت انتباهي وجود استاندات خشب غريبه قدام المسجد "على اعتبار اني حافظه المنطقه زي مانا حافظه بيتنا"..!ـ
المهم من باب الفضول كالعاده.. رحت استطلع الموقف و لقيت حاجه هايله جدا حاصله.. معرض صور فوتوجرافيه لفنان اسمه لوكاس ماكسميليان عن المسلمين في النمسا.. تخيلوا الجمال.. السيد لوكاس ماكسميليان يا جماعه ساب كل جاليريهات القاهرة و القاعات الفنيه و ملتقيات الصفوة من الفنانين و الادباء و راح عمل معرض في ساحة الحسين.. واحنا قاعدين..!ـ
طبع الصور و نصب استاندات و علق الشغل في الشارع وكتب تعليقات بالعربي و الانجليزي تشرح كل لقطه باستفاضه.. واحنا قاعدين..!ـ
جاب شغله ونزل بدماغه و فنه للناس البسطاء في الشارع.. واحنا قاعدين..!ـ
عايزه اقول قاعدين زي قلتنا.. بس مش عايزه اضايق حد.. واولكم انا..!ـ
بجد يا جماعه احنا ياللي فاكرين نفسنا مثقفين.. فنانين.. او على الاقل شايفين نفسنا فاهمين و متعلمين.. عملنا ايه للناس البسيطه اللي في الشارع..؟
كام واحد فينا فكر يوصل اللي عنده للناس.. يشركهم في فكره او فنه.. الناس اللي عمرها ما هاتفكر ولو فكرت مش هاتقدر تروح ندوه تسمع كلمتين من روايه ناجحه ولا بيتين من قصيده حلوه.. ولا حتى تشوف معرض رسم او تصوير.. ولو لا قدر الله راحوا هايحسوا انهم في المكان الغلط.. غرباء.. مش في مكانهم .. مش وسط ناسهم مش على راحتهم.. احنا فين من اهالينا دول؟؟؟
واوعوا اسمع حد منكم يقوللي الناس دي مش في دماغهم فن ولا بطيخ و مش ناقصينا.. ولا يقوللي انهم مش هايستقبلوا ولا يهتموا.. علشان الصور بتقول غير كده...
Friday, December 01, 2006
كنت مره سمعت حد بيتكلم -مش فاكره مين من المشايخ- عن موضوع بر الوالدين..ـ
ولفت نظري في كلامه نقطه كنت دايما بافكر فيها بس عمري ماطرحتها للنقاش.. يمكن لانها غريبه شويه و يمكن لانها هاتفتح باب جدال و شكاوى كتير و مش بعيد انها تفتح بيبان حزن وحالات نفسيه كمان!!ـ
النقطه دي كانت عن بر الابناء.. و ازاي ان الاهل هم كمان مطالبين ببر ابناءهم..ـ
فرحت اوي لما سمعت الحكايه دي رغم انه مازودش الكلام فيها و لا شرحها باستفاضه بس كل اللي فاكراه انه جاب حديث بيدلل عليها..ـ
المهم في الموضوع هو الفكره نفسها.. فكرة بر الابناء دي..ـ
يعني معنى كده ان الاب و الام دول عليهم واجبات تجاه اولادهم..ـ
ايوه..ـ
طب ده معناه ان في التزامات تانيه عليهم غير الاكل و الشرب..ـ
ايوه برضه.. هو يعني بر الوالدين كان المقصود منه الصرف عليهم بس..؟
لا طبعا..!ـ
طيب يبقى اشمعنى بقى!!ـ
طيب يعني معنى كده ان الاهالي اللي بيخلفوا ولاد و بنات و بتعاملوا معاهم على انهم "حاجه بتاعتهم" زي كتابي و مفتاحي و عربيتي و هدومي..ـ
دول كمان ولادي.. اعمل فيهم اللي انا عايزه و اربيهم زي مانا عايز.. ادلعهم .. براحتي.. اقرفهم.. انا حر..ـ
لا يا سيدي الفاضل.. عندي ليك مفاجأه.. انت مش حر ولا حاجه.. انت اب.. وانتي ام!!ـ
جبتي التايهه انتي يعني .. ماحنا عارفين و علشان كده احنا حرين.. مش بيقولوا انت ومالك ملك لابيك..؟؟
ايوه ماشي بس الملكيه دي حاجه تانيه خالص غير الملكيه اللي في دماغ سعادتك..!!ـ
طب بيقولوا ان الجنة تحت اقدام الامهات.. اعترضي بقى و قولي فيها حاجه دي..!!ـ
لا مش هاقول بس برضه هاسألك.. انهي امهات دول؟؟
مافيش نقاوه.. الكلام عام يبقى مافيش شروط..ـ
بالذمه ده كلام يرضي ربنا.. يعني عايزين تقنعوني ان الاب الحنين اللي بيحب اولاده و بيحترمهم و بيعلمهم ازاي يحبوه و يحترموه قبل ما يخافوا منه.. عند ربنا زيه زي اللي بيصّبح عياله بعلقه و يمسيهم بعلقه بسبب و بدون سبب وصباحه شتيمه ومساه خناق ..!!ـ
ماظنش..ـ
ولا الام اللي حضنها دافي وعقلها واعي و فاهمه يعني ايه امومه و حنيه و يعني ايه ضمة حضن و طبطبة قلب.. زي الام اللي الحجر ألين من قلبها و اللي غلطها سابق صحها..!ـ
ماظنش برضه..ـ
اكيد في فرق.. اكيد في اختلاف..ـ
ايوه كلنا بنقول اننا عارفين ان اهالينا بيحبونا.. بس هل يا ترى حاسين بده و لا كلام بيتقال و بس..ـ
ايوه كلنا بنقول اننا بنحب اهالينا.. بس هل ده حب بجد ولا برضه كلام بيتقال علشان لازم يتقال..ـ
انا مش باقول اني منتظره كل الناس تبقى هايله و ممتازه لانه مش ممكن.. ولا باقول اني عايزه الدلع الزياده وقلة التربيه برضه لان ده مش صح..ـ
انا بس باسأل نفسي و باسألكم.. يا ترى الشكل السليم للعلاقه بين الاهل و الاولاد المفروض يكون عامل ازاي..؟
و ياترى اللي فينا جواه مشكله مع اهله وعايش بيها طول عمره.. هل بيواجه نفسه بيها و بيتكلم و يحاول يحلها ولا كمشان في الدره مستني لما ربنا يملكّه طفل ويطلّع عليه القديم و الجديد..؟
و الاهم بقى.. هل ياترى احنا لما ربنا يرزقنا اولاد.. هل هانختلف عن اهلنا في طريقة التفاهم والتربيه ولا هانكرر نفس الاخطاء؟؟
يعني هانبقى احنا غيرهم ولا هايبقى الولد سر ابيه و اقلب القدره على فمها تطلع البنت لامها؟!؟؟
<<Home
