يؤلمني جدا احساسي بالغربة في عينيك..
يملؤني خوفا احساسي بالوحشة بين يديك..
تتألم مثلي انفاسي..
تختنق من الحزن القاسي..
تصرخ في صمت .. حررني..
فانا لن اهرب منك اليك..!
ــــــــــــــــــــــــــــــــــــــــــــــــــــــــــــــــــــ
Wednesday, March 15, 2006
Monday, March 13, 2006
ساعات السكات يقول كل الكلام..
و يوصف آهات و يوصف آلام..
و يبكي ويصرخ و ينطق ملام..
لحد ما تبرق قصاد عينه كلمة..
تشق بشعاع نورها قلب الظلام..!
ــــــــــــــــــــــــــــــــــــــــــــــــــــــ
Sunday, March 12, 2006
باحلم اعيش من عمري يوم في جزيرة وحديّه..
ليها قمر.. فيها شجر.. يطرح وروده حواليّه..
وانا و البحر نبقى اصحاب.. ليلاتي نغني اغنيه..
و ييجي الفرح وّيا الصبح يضّوي الدنيا في عينّيه..
باحلم اعيش من عمري يوم كما العصفور بِحُريّه..
سَما فُوقي.. و موج تحتي .. وكل الدنيا دي لِيّه ..
و اخر الليل.. يِضموني غصون عِشّي بِحنّيه..
و ييجي الفرح وّيا الصبح يضّوي الدنيا في عينّيه..
باحلم اعيش من عمري يوم في قلب الحلم جِِنّيه..
و اه يا سلام.. لو القى كمان في إيدي عصايه سحريه..
و احقق للحياة احلام واداوي جروحها بإيدّيه..
و يجي الفرح وّيا الصبح يضّوي الدنيا في عينّيه..
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
Tuesday, March 07, 2006
اقولك في سرك.. كلام راح يسُرّك.. ويمكن يضُرّك ..
و يمكن يكون..
كلام غصب عني .. و هافرح واغني .. و هاحزن كأني..
لبسني الجنون..
و تفهم كلامي .. تحس بالامي.. تطبطب تطيّب..
و جرحي يهون..
كأنك شقيقي.. صديقي ورفيقي.. و ساعة التجلي..
بقربي تكون..
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
Friday, March 03, 2006
انا قلبي عصفور وانحبس جوه القفص..
لا منه كافح رفرفة و لا منه في العز انغمس..
ورغم انه قال .. كده حالي عال.. بلا طير بلا قطعة نفس..
مع كل نور من كل صبح.. بتجيله هفة و ينتكس..
يفلت من القضبان يطير.. ولو اتزنق .. ولو اتفعص..
من فرحته ورغم الالم.. الاقيه كمان غنى و رقص..!ـ
ــــــــــــــــــــــــــــــــــــــــــــــــــــــــــــــــــــــــــــــــــــــــــ
<<Home
