بـاحـلم علـــى قـدّي....ـ : اه يا قلم..

كل اما انوي امسكك و اكتب حكايه مضحكه..

القى الكلام نازل ملان اشجان وفيه حزن و بكا..

و الاقي البسمه مرسومه على رمال متحركه!!

كل اما ابص من شباكي و اتملّى..

و اقول الشمس من مشرقها اهي هلّه..

و اركز في السما كويس.. الاقي الصوره متفبركه!

ازاي شروق في السما و غروب بيملا الارض؟

داحنا من التقصير.. خايبين في سنه و فرض..

خايفين لو نورها يفضحنا.. و يبين اللعبكه!!

هانبان على حقيقتنا و نشوف على المكشوف..

ازاي حياتنا في بيتنا.. ماليها رعب و خوف..

و حتى في شدتنا .. لمتّنا متفككه!!!!

هاحكيلك ايه يا قلم.. مانت شايفنا و سامع..

القلب مفطور وجع .. و عيون ملتها مدامع..

اطفال و كبار بتموت.. و الاحداث مهلكه..

و احنا في مص الشفايف و الندب مانتوصى..

والكل شايف و عارف نهايتها ايه القصه!

نأسف و نشجب.. نستنكر..وايدينا متشبكه!!!

ياهل ترى يا بكره .. هاتجيب معاك الضي..

و لا اساسا انت .. زعلان و مانتاش جيّ؟!

و تقول ماجيش غير وانتم.. بتخوضوا المعركه!!!

ــــــــــــــــــــــــــــــــــــــــــــــــــــــــــــــــــــــــــــــــــــــــــ