بـاحـلم علـــى قـدّي....ـ : كل يوم حاجه جديده..

فجأة النهارده قررت اني اتعلم كل يوم حاجه جديده.. ايوه اكيد كنت باتعلم حاجه جديده كل يوم بس يمكن مش باحس بيها و بتضيع وسط الاحداث و تاني يوم بتبقى امر واقع او شيء مسلم بيه زي حاجات كتير في الحياه اتعلمناها من غير مانحس!!ـ

علشان كده قررت ان كل يوم لازم يكون فيه شيء جديد اتعلمه او حتى افهمه ة اقف عنده و افكر فيه و الاهم اني احس بيه.. مهما كان بسيط او عبيط.. مش لازم اتعلم كيفية صنع القنبله النوويه ولا لازم اعرف اسامي اللي ماتوا في حرب المليون شهيد بس اكيد في شيء جديد و بسيط هافهمه و اتعلمه كل يوم..ـ

النهارده مثلا و انا في المترو..فهمت و اقتنعت ان الرفض المطلق عمره ما هايغير الواقع.. طول عمري باقول اني مش باحب حد يقولي لأ لمجرد اللأ.. كده بدون سبب و بدون مبرر في حين اني باعمل كده ساعات من غير ما احس!!ـ

انما بالعكس.. التفاعل مع الواقع ده ايا كان شكله بيوضح امور كتير و بيبين اذا كان الواقع ده سواء كان ظروف او اشخاص او حتى اماكن تستحق الرفض فعلا ولا ممكن التكيف معاها ولا هي فعلا كويسه و تستحق التعامل باحترام و تقدير.. و على الرغم من اني من المؤمنين تماما بان الانطباعات الاولى تدوم و ان الحمد لله انا و احساسي في فريق واحد مش بنلعب ضد بعض .. انما برضه متأكده ان الخوف ليه مفعول السحر وممكن يقلب الامور و يغير المفاهيم و يغطي على اصدق الاحاسيس و اجملها..ـ

علشان كده مش هايحصل تعارض لو اكدت احساسي بشكل من اشكال التفاعل المقبول.. يعني منها افهم اكتر و منها الخوف يضيع و يبان الاحساس اوضح.. يعني.. الحكايه يمكن عامله زي الشباك اللي مغطيه التراب لو مش هامسحه مش هاقدر اشوف وراه ايه و حلو ولا وحش.. مهما كان قلقي و خوفي من التراب يوسخ ايدي او مهما كان رفضي و اعتقادي اني مش عايزة اعرف ورا الشباك في ايه؟!؟!؟