بـاحـلم علـــى قـدّي....ـ : تاني يا حديد !!!ـ

لتاني مره في اقل من شهر اصحى الاقي هيئة السكة الحديد سايبالي مفاجأه سوده زي دخنة قطوراتها و رماد جثث ركابها و مصير اللي ناهبنها باذن الله..ـ

خط تاني و قطر تاني و ركاب تانيين و حادثه تانيه و موت تاني.. بس المره دي في الفجر.. لسه الدنيا ضلمه!! غالبا الركاب كانوا نايمين يا عيني.. واكيد السواق كمان.. هو مش بشر برضه ولا ايه! و في الاغلب الملاحظين كمان كانوا نايمين.. عادي يعني ناس عاديه بتنام بالليل مافيهاش حاجه!!ـ

الحادثه الحمد لله مرت بسلام و اخرجوا المصابين .. بس الناس تعبت بقى .. مش كل شويه حادثة قطر و ناس تموت و هم يتدبسوا و يطلعوا مصابين و يطلعوا جثث.. مش كده يعني .. دول بشر برضه و الدنيا حر!!

لا و الاكتر من كده انهم جايين يموتو في عز الليل !! بالذمه ده مش تهريج و سخافه!! ناويين تموتوا.. موتوا بالنهار.. مش عارفين ان الباشا الوزير في مارينا و كمان مراته محرجه عليه يرجع متأخر فما بالك بقى لو نزل اصلا في وش الفجر كده هاتعمل فيه ايه .. و بعدين مش تنقوا حته تكون منوره شويه تموتوا فيها يعني جنب اي عمود نور من اللي ماليين البلد و خصوصا الارياف و طريق القطر.. سايبين الدنيا كلها و جايين تموتوا في الضلمه .. طب يشوفوكوا ازاي.. يطلعوا جثثكم ازاي.. فعلا استهتار و تسيب.. و عقابا ليكم و ردعا لكل من تسول له نفسه انه يموت بالليل في حته ضلمه كده تقرر ترك الجثث حتى الصباح الباكر لعدم وجود كشافات لانتشالها واهو اللي مات مات خلاص مش هاتفرق معاه بقى بالليل ولا بالنهار..!!!!!ـ

الغريب و المقلق في الموضوع اني باحاول الاقي اي اخبار جديده على شريط الاخبار في الجزيره.. مافيش!ـ

طيب على المصرية.. بيذيعوا مسلسل متخلف و برضه مافيش اخبار..!ـ

انا مش عايزه حاجه غير اني اتطمن على التسعيره الجديده و اعرف البني ادم بقى بكام الشهر ده .. علشان الواحد يعمل دراسة جدوى و يحاول يحدد يركب القطر امتى بالضبط علشان يجيب اعلى سعر.. و بعدين النقطه الاهم كنت عايزه اتطمن ..اذا كانوا اشتغلوا بالليل.. جابوا الكشافات منين.. انا خايفه يكونوا اجروها من خضر بتاع الفراشه لانه اكيد هايستغل الظروف و يغلي عليهم و دي مش اخلاق بصراحه.. يعني مايبقاش المصيف انضرب و كمان يأجروا كشافات بسعر عالي علشان خاطر شوية ناس بتهرج و مش عارفه تختار وقت صح تموت فيه!!ـ

حسبي الله ونعم الوكيل