المهم بقى يرجع مرجوعنا لموضوعنا.. كنت باقول خير اللهم اجعله خير اني من كام يوم اثناء رحلتي اليوميه الى الشغل و اللي باستخدم فيها الاختراع الهايل الملقب بالسي تي ايه " دول حروف اختصار جملة هيئة النقل العام بس بالانجليزي علشان يبقى اروش و اشيك" و اللي طبعا احسن من اي وسيلة مواصلات تانيه اولا لانه مكيف بارد صيفا معتدل ممطر شتاءا و ثانيا لان معظم مرتاديه من طلبة الجامعه و اهالي المناطق ذات القدره على دفع اتنين جنيه و نص في الباص في المشوار الواحد "ودول طبعا مش كتير و محدش برضه يستهبل و يسألني ليه يا ترى علشان مش هارد عليه"..

ابتدت بقى الحكايه من اول ماركبت الباص اللي جه متاخر عن معاده اكتر من ربع ساعه "وده اقل واجب يعمله معانا عالصبح" و من اول ماستقريت في الكرسي المريح ابتديت استرجع بعض الحوارات اللي دارت في بيتنا في اليوم اللي قبله و قد ايه كنت حاسه بالاستهبال معبأ المكان.. محدش بيتكلم دوغري.. محدش بيحترم كلمته.. و طبعا محدش بيحترم عقل التاني.. فضلت الافكار و المواقف تتنطط في دماغي عن فكرة الاسنهبال  وافتكرت اني كنت كتبت قبل كده عن الاستعباط بوست عمل مشاكل جامده جدااااا.. و ابتديت افكر بعدها ياترى ايه الفرق بين الاستهبال و الاستعباط؟؟ طب انهي فيهم الاعم و الاشمل؟؟ طب انهي فيهم الاقوى تأثيرا على الاخرين؟؟؟ طب يتميزوا ازاي عن بعض؟؟؟؟ مالقتش اجابه!!!

كل اللي فهمته وقتها ان الاستهبال و الاستعباط وجهين لعمله واحده صاحبها مفلس!!

عدى معظم الوقت وانا بافتكر كتير من مواقف الاستهبال اللي مرت علي.. ولقيت ان اسبابها بتختلف كتير من شخص لشخص.. في ناس بتستهبل من غير ماتقصد تبقى كده.. و في ناس تانيه بتستهبل علشان دماغها مرتاحه كده.. و في ناس تالته بتستهبل علشان بتحب تعمل كده.. و في ناس رابعه بيستهبلوا لانهم هبل فعلا.. ودول مش موضوعنا لانهم اقليه ومش مقياس..

في وسط التحليل الفلسفي العظيم لنظرية الاستهبال العظيمه دي.. لاحظت فجأه ان الباص بيقف.. عادي.. هو مكتوب في المانيوال بتاعه انا حر.. اقف مكان ما يريحني و اللي مش عاجبه يا يهدي يا يعدي!!! بس وقوفه المرادي طول حبتين .. يعني مش على قد طلوع او نزول راكب.. بس الباب مفتوح و فعلا في حد نزل و بعد تركيز لثواني.. اكتشفنا كلنا ان اللي نزل هو الاخ الفاضل السيد السواق المحترم...

قلت عادي.. بيشوف حاجه في العربيه و طالع على طول.. بتحصل..

او يمكن بيشرب وراجع عالسريع.. حقه..

طب يمكن حد ضايقه ونزل يغير جو.. كل شيء وارد..

ومع كل التساؤلات دي و اللي كانت بتدور في دماغنا كلنا.. انا و الاخوه زملاء الرحله.. كانت عينينا كلنا متعلقه على الشبابيك بتراقب الموقف..

سواقنا الهمام.. نزل من العربيه.. عدى بين زحمة العربيات اللي راكنه صف تالت و تاني عى اعتبار انه راكن صف رابع.. ادعوله ربنا يحفظه.. اتقدم بخطوات ثابته ناحية الرصيف.. شق الزحام و خاض الصعاب ودفع الفلوس و اخد الكوبون اللي بيه هايقدر يقف في الطابور و يطالب بحقه.. من الشبرااااااااوي..

الباشا يا محترمين واقف و موقف حالنا علشان يجيب فول و طعميه من عند الشبراوي.. "يا برودك يا اخي".. " اما صحيح قلة ذوق".. "يلا يا عم ورانا اشغال"... تعالت الهمهمات من بين الركاب الحاقدين على سيدهم و تاج راسهم البيه السواق في محاوله فاشله منهم لقلب نظام الباص.. اما استهبال صحيح!!

قال ايه هايتأخروا على مواعيد الشغل.. قال ايه دفاتر الحضور هاتترفع من غير ماتنورها امضتهم.. قال ايه اليوم هايتخصم من المرتب... اما استهبال صحيح!!!

و فجأه و بدون مقدمات انشقت الارض عن امين الشرطه.. بيدور علىالسواق و بيشوفه واقف كده ليه.. و كمان عايز يديله مخالفه.. اما استهبال صحيح!!

قال ايه فاكر نفسه مدير مرور الجيزه يا خي.. فيها ايه لما الراجل يركن صف سابع في شارع من ازحم شوارع القاهره.. بجد بجد استهبال صحيح!!

المهم يا ساده يا كرام ان السيد السواق باشا عاد الى ادراجه سالما محملا بغنائم النزوله دي متمثله في كيس صغير في ايده.. "و يا ريت محدش يستهبل و يسألني.. يا ترى يا هل ترى.. اشترى ايه؟ علشان انا الفضول كان هايقتلني بحكم العاده زي مانتوا عارفين"  طلع الباشا الباص بعد ما صبح على امين الشرطه و عزم عليه بفطار.. و رمى نظرة استغراب و قرف على الركاب المتهورين الحقودين اللي استهبلوا ونزلوا من الباص و عينه اللي كلها شماته بتقولهم ابقوا قابلوني لو لقيتوا حاجه تانيه تركبوها يا كلاب..!

و ريح نفسه عالكرسي المتين واتحرك بالقافلة بالصلاة عالنبي وسط عواء الكلاب "اللي هم احنا طبعا!!" اللي فضلوا في الباص على امل انهم ينعموا بشرف الوصول للمحطه اللي عايزينها بعد عمر طويل.. لكن يا خساره .. الحلو مايكملشي.. بعد اقل من عشره متر من الحركه.. لقيناه بيهدي تاني بس المرادي اكتفى بفتح الباب و قال بعلو صوته.. مافيش معاك عيش طري يا ريس؟؟؟ وهنا كلنا انتفضنا من الفرحه.. ان الريس هو كمان معانا في الموقف الجلل ده.. و قلنا مادام بقى فيها سيرة الريس يبقى القعده هاتحلو و الجو هايطري عالاخر ان شاء الله!!

بس للاسف كانت الصدمه اكبر من احتمالنا كلنا لما الريس بتاع العيش اللي ماشي بعجلته جنب الباص ماطلعش معاه عيش طري.. اما استهبال صحيح!!

وطبعا انا المسحوبه من لساني كالعاده ماقدرتش غير اني اعبر عن استيائي من الموقف بشده و امتعاض.. وقلت للسواق بكل حده بصراحه كده مش معقول.. يعني كل العطله دي و مغلب نفسك و نازل و طالع وكمان من غير ما تعزم و كل ده و تطلع جايب فول سايب و تستنى العيش الطري من اللي يسوا و اللي مايسواش.. لا لا.. كده كتير اوي..!!!

بصلي من المرايه في هدوء شديد و اتنهد في تعجب و كأنه بيقولي انتي هبله ولا اييييه.. هو معقوله برضه اتعب نفسي كل ده على فول ولا طعميه.. طب ماهي عربية الفول واقفه قدامنا في الموقف طول النهار.. ده لا فول و لا طعميه يا بنتي......

ده بتشنجااااااااااااااان!!!