بـاحـلم علـــى قـدّي....ـ

رغم ان اسمها ام عبير الا اني ابتديت اشك ان عبير دي شخصيه وهميه..!ـ

اصل يعني مش معقول يكون في بنت علاقتها بامها عامله كده.. ايوه شفت مشاكل كتير و عارفه ان البيوت ياما بتداري و ان في علاقات اسريه ضايعه كتير و عارفه كمان احنا كلنا مش ملايكه و بنتخانق و نتصالح و نزعل امهاتنا و يمكن كمان نزهق منهم ساعات .. انما سنيييييين طويله مانشوفهمش و لا نفكر نزورهم برغم كل المرض و التعب اللي هم فيه.. كده كتير..ـ

بجد ام عبير المرادي كانت غير.. كلامها كان غير و نظرة الحزن في عنيها كانت غير.. اول مره احسها بتشكي بقلب موجوع اوي و مش بتاخد الكلام بتريقه و تسخر من حالها.. اول مره دموعها تملا عنيها و ماتحوشهاش.. اول مره احس اني مش لاقيه كلام اقوله معاها ولا عارفه اضحكها..!ـ

قالتلي هي بنتي و اخواتي هايتعبهم اوي لو خدوني عندهم كل واحده شهر .. دانا باخدم نفسي و مش هاكل كتير.. ونزلت دموعها..ـ

ام فاطمه بقى .. ام اوي.. حنيه و طيبه مالهاش حد.. ورغم انها مقتوله من الوجع على بنتها اللي بتزورها كل فين و فين و كمان من غير احفادها.. انما بين كل كلمه و التانيه تدعيلها و تديلك الف عذر و عذر علشان ماتزعلش من فاطمه.. وكأن اي كلام في الدنيا ممكن يخليك تعذر فاطمه على قعدة امها في الدار لوحدها..!!ـ

الحاجه انعام بتحب الولاد اكتر من البنات.. بتلمهم جنبها على السرير و تطبطب عليهم و تدعيلهم.. و احنا نغيظها و نقولها ان ده خاطب وان ده متجوز و لو توافقي تبقى زوجه تانيه .. ماشي.. تضحك اوي و تقول وماله!!ـ

انعام معندهاش اولاد.. و من فرط احساسها و عزة نفسها .. بيسموها في الدار القطه.. لانها و علشان ما تحتاجش مساعدة حد.. بتمشي على ايديها ورجليها..!ـ

كريمة.. وش جديد اول مره اشوفه.. مبتسمه دائما .. يمكن لان ربنا كرمها و اخد منها البصر علشان ماتشوفش كمية الحزن اللي حواليها.. و لا تشوف دموعنا و هي بتحكي على الناس الجميله اللي كانوا مضللين عليها و هي بنت وحيده .. بس يا خساره .. كلهم مشيوا..!!ـ

كريمه قالتلي انا ماتجوزتش علشان نسيت.. ماتخيلتش ان هاييجي علي يوم ابقى فيه لوحدي في الدنيا..!! قالتلي ان ولاد اخوها بيسالوا عليها لانهم بيحبوها.. بس يعني مش كتير.. علشان ظروفهم برضه!!ـ

حكتلي كريمه على ايام العز و العزوه.. وااللمه في بيت العيله و سندوتشات السمنه بالسكر.. و قالتلي.. انتوا مش عايشين يا ولادي!!ـ

محاسن خبيزه.. قالتلنا انها لما كانت في لبنان مع الناس اللي كانت بتشتغل عندهم كانوا العساكر يوقفوها و يشوفوا بطاقتها .. ولما يقروا اسمها يفضلوا يضحكوا.. علشان خبيزه دي مش اسم شهره.. ده اسم جدها بجد اللي مكتوب في البطاقه.. و حكتلنا على التلفريك و الجبال في لبنان..!ـ

محاسن ليها اهل في مكان ما في بلدهم.. بس ماتعرفش عنهم حاجه لانها من ساعة ماخرجت علشان يشغلوها في البيت ده و هي تقريبا مارجعتش بلدها كتير..و الناس اللي كانت معاهم هم اللي جابوها الدار بعد ماتعبت اوي ـ

دول عينه من ساكنات دار الاسلام.. الحي العاشر- مدينة نصر.. لما تروحوا تزوروهم ممكن تتاثروا شويه و ممكن تحزنوا شويه و ممكن تعرفوا حكاوي تانيه .. بس اكيد هاتحبوهم اوي و هاتسعدوهم جدا..!!ـ