بـاحـلم علـــى قـدّي....ـ

من فتره و انا عندي قناعه بفكرة الطاقة الانسانيه.. فكرة ان البشر بيعدو بعض -من العدوى يعني- بانواع طاقاتهم.. بقصد او من غير قصد.. طبعا قريت شويه في الموضوع و سمعت كتير عنه و اكتشفت ان انا مش صاحبة نظريه علميه و اني مش هاقدر للاسف اسجل براءة الاختراع باسمي..!!ـ

لا بجد موضوع الطاقة الابجابية و الطاقة السلبية للبشر ده حقيقي فعلا..ـ على الاقل بالنسبالي..!ـ

يعني انا مثلا باعتباري كائن مودي من الدرجة الاولى وبني ادم مزاجي مع مرتبة الشرف.. اقدر اقول و بكل ثقة ان مودي عنده شعره.. ساعه تروح و ساعه تيجي.. كلمه توديه و كلمه تجيبه .. احساس يعليه في السما و احساس يخسفه في سابع ارض.. بس بشرط واحد.. انها تكون صادقه!!ـ

ايوه مش باهزر..اصل انا الشعره بتاعة مودي حساسه مووووووت للكدب.. تعزه زي عنيها.. مش علشان تفرح بيه انما علشان تحط صباعها في عين الكداب و تقوله.. فرصه سعيده.. كلامك كلللللله في الهوا و لا يفرق معايا ببصله مهما كان حلو وعاجبني و كنت اتمنى اسمعه بجد و بحق و حقيقي..!!!ـ

و الظريف بقى ان الكلام ده برضه بينطبق عندي على الطاقه السلبيه.. يعني مش اي كلام وحش يوجعني و السلام.. لا معلش الكلام اللي يوجع و يحبط و يكئب لازم برضه احس انه صادق.. مبذول فيه مجهود يعني.. مش بالساهل كده .. اي حد معدي يحدف كلمتين يسموا البدن كده ببساطه.. لااااااا .. دي مشاعر و احاسيس مجتش من فراغ.. يعني برضه لازم نتعبلها يا جماعه!!ـ

خلاصة القول و خدوها مني نصيحه.. اللي حابب يقولي كلمه تفتح نفسي.. يشد حيله و يستجمع قوته و كل صدقه و يقولهالي باحساس.. يا اما للاسف مش هاحسها..!!ـ

و برضه اللي نفسه يسم بدني.. وواقفه في زوره كلمه نفسه يحبطني بيها .. معلش علشان خاطري يتعب نفسه شويه ومايحدفهاش كده من غير حماس.. لازم يحسها و يصدقها و يخبطني بيها من كل قلبه.. يا اما برضه للاسف مش هاحسها..!!ـ

اتفقنا؟؟

"لا اضع قواعد للسلوك.. فافعل ما تشاء مادمت تفعله بكل جمال"

جمله شدتني جدا من كتاب (النبي) لجبران خليل جبران.. حسيتها اوي.. حسيت انها بتمس حياتي و احساسي بشكل كبير.. فعلا الجمال في الاداء احيانا كتير بيخلينا نقبل امور و افعال.. ماكانش ممكن نقبلها لو اتقدمت لنا باقل قدر من القبح!!ـ

اد ايه الحياه كان ممكن تبقى الطف و احلى لو ان كل واحد فينا كان حريص على جمال كلامه و افعاله .. حتى لو كان عايز يقول او يعمل حاجه غلط.. يعني مش لازم اطلق عليك رشاش كلام يسم البدن و لا اخبطك بحديده على دماغك علشان اقولك حاجه مش عاجباني..ـ

انما ممكن بكلمه حلوه اخليك تتمنى تغير نفسك علشاني ولو كان ده مش صح..ـ

و بلمسه حلوه اخليك تتمنى تهد الدنيا علشاني برضه ولو كان ده مش صح!!ـ

الحياه بجد كان ممكن تبقى احلى كتير و اسهل بكتير.. لو عشناها بجمال!!ـ