امبارح كان عندي سهرة تلفزيونية قصيرة جدا كالعادة.. يادوب على قد الوجبة
اللي مالهاش مسمى اللي باكلها لما ارجع من الشغل.. المهم الوقت ده كان
مابين حاجتين شفتهم و عجبوني اوي..
اول حاجه كان برنامج حبة عسيلي بتاع صديقي القديم احمد رجائي او احمد العسيلي زي ماهو معروف على اوو تي في..ـ
كان بيسال في فقرة عسيلي في الشارع اسئلة لطيفة جدا خلتني افكر انا شخصيا في اجاباتها و احاول اجاوب عليهم و اسالكم لو حد عنده اجابات هو كمان..ـ
ايه احلى حاجه في الدنيا؟
في رأيي الطفولة
ايه اهم حاجه في الدنيا؟
الامان
ايه اوحش حاجه في الدنيا؟
الكدب
ايه اصعب حاجه في الدنيا؟
الغربة
ايه اهم عيوبك؟
التهاون في حقي
عملت ايه علشان تصحله؟
اشتغلت على اعصابي وقوة احتمالي كتير وخلقت لنفسي حدود مش مسموح حد يتخطاها واولهم انا..ـ
مين مثلك الاعلى؟
لوقت طويل كان اخويا الكبير.. و في وقت تاني كان ابويا.. و في وقت تالت كانت امي و في مواقف معينة بتبقى اختي الصغيرة "علشان انا عارفه انها هاتقرا البوست ده" و ساعات يبقى اخويا التاني و ساعات تانيه بيبقوا اصحابي وممكن ناس عادية من الدنيا!!ـ
وبعدين اكتشفت مؤخرا ان كل انسان باتعامل معاه من دول و من غيرهم باتعلم منه حاجه بابقى نفسي اعمل زيها و افضل ورايا و اطلع عيني لحد ماتعلمها و اتعود عليها و ادور على غيرها.. يعني القصه مش ثابته و لا بتبقى مرحله و بتعدي..ـ
عايزه كل اللي يقرا البوست ده يجاوب على الاسئلة دي.. و من غير لا تاج ولا صولجان.. اللي يعدي يبقى يقول وخلاص من غير تدبيس و اللي مش عايز يقول كأنه مقراش.. كل مواطن حر في تتيييج نفسه!!!ـ
تاني حاجه اتفرجت عليها كانت فقرة من برنامج العاشرة مساءا استضافت فيها منى الشاذلي اطفال مصريين كانوا مشتركين في مشروع الديموقراطية بين مصر و امريكا.. الفكرة اللي فهمتها انهم بعتوا مجموعه من الطلبة الصغيرين اعدادي و ثانوي امريكا علشان يتعلموا الديموقراطية الامريكية و يحتكوا بالتجربة بشكل و اقعي.. و اكتر ماعجبني في الموضوع ان الولاد ماشاء الله عليهم وخصوصا اللي كان اسمه كريم عصام ده "تانيه اعدادي بالمناسبة".. فيهم وعي مش موجود في ناس كبار كتير بمعنى الديموقراطية الحقيقي وماتخدعوش باي شكل من الاشكال بالوهم الكبير ولا بهرتهم الهالة الامريكية وناقشوا واختلفوا واتكلموا كلام يفرح و كل اللي عايزه اقوله هنا في كلامي عن الولاد دول لاني مش ناويه ادخل في تفاصيل التجربه ان بجد يا جماعه التربيه بتفرق.. الولاد دول كلهم اتربوا في اسر عاديه.. محدش فيهم ابوه خبير سياسي ولا اقتصادي بس كلهم اتربوا على انهم يلاحظوا ويفكروا ويتكلموا .. يتناقشوا ويعترضوا ومش عيب لو يغلطوا علشان يتعلموا..ـ
لوسمحتوا يا جماعه.. اللي عنده ولاد وبنات يربيهم كويس .. مش هاقول اكتر من كده!!ـ
Add a Comment
from Egypt
said:ايه احلى حاجه في الدنيا؟
الحب الصادق
ايه اهم حاجه في الدنيا؟
الإحترام المتبادل بين الناس
ايه اوحش حاجه في الدنيا؟
الخيانة
ايه اصعب حاجه في الدنيا؟
الإحباط
ايه اهم عيوبك؟
الحماس المبالغ فيه سريع الإنتهاء
عملت ايه علشان تصحله؟
محاولة تقوية الإرادة
مين مثلك الاعلى؟
مفيش حد معين، الكويس في مجاله بيكون المثل الأعلي في النقطة ده
ممكن أقول إستقاء الخبرات وإنتقائها
from Egypt
said:عجبنى أوى البوست ده و قلت اشترك يمكن يجيلى تاج و لا حتى سلطانيه
أحلى حاجه فى الدنيا؟
الاطفال لحد ما يكبروا
أهم حاجه فى الدنيا ؟
الرضا و القناعه
أوحش حاجه فى الدنيا ؟
الكبار لما يستعيلوا
أصعب حاجه فى الدنيا ؟
الألم لما يجى من حد كنت فاكر أنه قريب
أيه أهم عيوبك ؟
أنى مش عارف أعيش فى الزمن ده فى البلد دى
عملت ايه عشان تصلحه ؟
مش عايز , انا شايف أنى مش غلط
مين مثلك الاعلى ؟
كل ما الزمن بيمر بيا بكتشف أنه ابويا الله يرحمه
from United States
said:السلام عليكم،
انا بجد باكتب المشاركة دي و أنا فعلا بطلع الكلام من قلبي:
ايه احلى حاجه في الدنيا؟
الهـدايــة، وما يتبعها من لحظات التجلي والتلذذ في مناجات المولى ومحظوظ من يعيش هذا كله في كل يوم وليلة
ايه اهم حاجه في الدنيا؟
رضا الله
ايه اوحش حاجه في الدنيا؟
البعد عن الله وتضيع الأمانة
ايه اصعب حاجه في الدنيا؟
مجاهدة النفس
ايه اهم عيوبك؟
التسويف ، الله يجيرني منه و إيـاكم. ويسترنا بستره الجميل فوق الأرض، وتحت الأرض، ويوم العرض
عملت ايه عشان تصلحه ؟
المعركة مستمرة ومازالت مستعرة، إدعوا لي
مين مثلك الاعلى؟
الرسول الحبيب عليه الصلاة وأتم التسليم
from Egypt
said:انا مش هاعق على ردودكم لانها اراء شخصية جميله ايا كانت..ـ
بس هاقولكم شكرا
Add a Comment
<<Home
from Egypt
احلي حاجه في الدنيا الرواقه و خفه الدم....اهم حاجه الحب بجميع اشكاله...اوحش حاجه الكدب...اصعب حاجه قله الحيله....اهم عيوبي....ضعف الثقه في النفس.....وادينا بنحاول نصلح....نخبط فيها و تخبط فينا و ما حدش عارف هترسي علي ايه!!!!