باحس الوشوش قدامي زي كتاب مفتوح.. دخولي فيه مسموح..ـ
وشوش مليانه كلام كبير.. ساعات يفرح و ساعات يجرح..ـ
ساعات عيون تنطق وجع ماستحملوش.. واحس قلبي بينخلع.. نفسه يهرب من بين ضلوعي و يجري عليها يضمها.. يطبطب عليها يقولها.. مش وحدك انتي اللي الزمان بكاكي.. مش وحدك انتي.. انا كمان بابكي معاكي..!ـ
و ساعات عيون من كتر فرحتها تكون.. زي كهارب الافراح تضوي من غير حساب.. نفسها كل البشر تفرح معاها.. نفسها كل البشر تكون احباب.. واحس قلبي بيتعدي.. يرقص يزغرط.. يبتدي.. يفط وينط يفتح شبابيكه و بيبانه.. كأن الفرح فرحه.. مش فرح جيرانه!!ـ
و ساعات عيون ماليها شرار.. الغل فيهم قايد نار.. وكره الناس مخليهم.. بيتمنوا اللي ياذيهم.. وتفرحهم دموع الغير.. وتبكيهم بشاير الخير.. وكانهم شياطين.. مش مخلوقين من طين.. واحس قلبي منهم مقبوض.. بس برضه صعبانين عليه.. وكأنهم مرضى بس الدوا مش في ايديه..!!ـ
وساعات عيون زي الازاز.. وراها ناس ماهياش ناس.. لا فرح فيها و لا حزن فيها.. ولا حتى في احساس.. ودي العيون اللي باجري منها بالمشوار.. باحس بقلبي فيها احتار.. مايبقاش فاهم ولا عارف يقولها ايه.. واخاف لو حن هو عليها تقسى هي عليه..!!ـ
بقالي كتير ماحسيتش ان يومي جديد..ـ
كأن اليوم بيتكرر بقاله سنين..ـ
بنفس الناس و الاحداث.. وحتى كمان نفس الاحساس!!ـ
سؤالات غريبه بتملاني مع كل "صباح الخير"!!ـ
هو النهارده ايه..؟ هو امبارح ماخلصش ليه؟؟!؟
طب هو بكره.. ايه الجديد فيه؟!؟
ليه مش حاسه بالايام؟
وليه دايما باحس كاني.. عشت اليوم ده قبل الناس!!ـ
كتير باتمنى ييجي اليوم..ـ
اللي تيجي الشمس فيه بدري اوي قبل معادها..ـ
تجيبلي النور لاجمل نهار ممكن تعيشه بنت في حياتها..ـ
يوم.. تجمعلي فيه اجمل اماني البشر..ـ
واعيش عمري من بعديه لحظه بلحظه.. ماقضيهاش ايام و خلاص..!ـ
اتنين ستات في منتهى اللذه و الجمال.. و بالرغم من اختلاف ظروف و امكانيات كل واحده منهم.. الا ان القدر جمعهم هم الاتنين في نفس الدار و حطهم تقريبا في موقف مشابه من بناتهم..ـ
ام عبير.. ست بسيطه جدا كانت بتشتغل عند ناس فتره طويله و لما كبرت و تعبت هم اللي جابوها الدار.. ليها بنت واحده وماتعرفش عنها اي حاجه من سنين طويله وقد ايه بتتاثر و تملا عنيها دموع الوحشه للناس اللي عاشرتهم سنين و دموع الوجع من البنت اللي راحت و قالت عدولي.. و بالرغم من كترة احزانها وتعدد امراضها الا انها بتساعد في شغل الدار و مش بتعرف تقعد ساكته من غير ماتعمل حاجه لاي حد ولكل حد وتقريبا هي مصدر الكوميديا الاساسي في الدار .. على طول بتضحك و بتضحك اللي معاها حتى لو اضطرت انها تتريق على نفسها!!ـ
مدام ناني بقى او مهندسة الديكور عنايات هانم حرم المرحوم لواء الشرطه .. ست ارستقراطيه بالسليقه.. عندها تلات بنات اتنين منهم مسافرين داخل مصر و خارجها و البنت التالته متجوزه في القاهره و بتزوها كل فتره.. طبعا مقدرش الوم عليهم لاني ماعرفش ظروفهم بس برضه مش قادره اتخيل الفكره لحد دلوقتي.. المهم انها صاحبة اوضه مستقله في الدار و بمجرد دخولك الاوضه ووصولك لمرمى بصرها بتبتدي تتعرف عليك بنظره فاحصه ماحصه علشان تعرف ارارك.. ومش بعيد تعرف اصلك وفصلك.. كل ده قبل ماتبتدي تسال اسئلتها المباشره الصريحه اللي بيها لازم غصب عن عينك تجاوب وتخضع قدام نظراتها القويه اللي يمكن اتعلمتها من ايام ماكانت رموشها الجراحه بتقتل عشر شبان كل يوم او ممكن تكون اتعلمتها من عشرة ضابط الشرطه الراحل.. المهم انها ست جميله جدا و عايشه على ذكرى الجمال ده و يمكن تكون الصوراللي ماليه الاوضه حواليها هي برضه اللي ماليه حياتها و مساعداها تفضل عايشه حتى لو كانت العيشه دي في الماضي الجميل..!ـ
اتنين من بين عشرين سيده في دار الاسلام في الحي العاشر بمدينة نصر.. كلهم هايفرحوا اوي لو اي حد قرر انه يروح يزورهم و يتكلم معاهم شويه في اي موضوع.. بس بشرط.. الكلام لازم يكون من القلب!!ـ
وعارف اكتر انه لو ماكانش ابتدى بالشر التاني عمره ماكان هايحاول ياذيه اصلا ..ـ
مش قادره افهم استمتاع المجتمع النسائي باللت و العجن عالفاضي و المليان و قدرتهم على الكلام في كل شيء بدون اي حدود او قيود او خصوصيات..ـ
وتعجبهم من اللي يحاول يخللي لنفسه مساحه من الخصوصيه المنطقيه..ـ
مش قادره افهم ازاي ممكن بني ادم يجبر بني ادم تاني على انه يحس بحاجه هو مش حاسسها..ـ
ازاي في حد ممكن يتخيل او يفكر ان الاحساس ده شيء ممكن ييجي بالضغط او بالحصار..ـ
مش قادره افهم ازاي ممكن بني ادم ينجح في انه يخرج اوحش مافي بني ادم تاني بمنتهى السهوله من غير ما يبذل مجهود ولا حتى يقصد..ـ
بالعكس ده يمكن يكون شايف انه بيساعده يبقى احسن..ـ
مش قادره افهم ان في بني ادم ممكن يتفتح قدامه باب خير كبير و مفيد ومش طالب منه مجهود علشان يخطي و يدخله..ـ
و يقف و دماغه الف جزمه ماهو داخل..ـ
ولسه في حاجات تانيه كتير مش قادره افهمها وماظنش هاقدر علشان كده باقنع نفسي انها مجرد طبايع بشريه وفروق فرديه علشان ارتاح شويه!!!!!!ـ
من اول الاسبوع اللي فات و من قبل بوست الاهلي وانا مالياني فكرة تانيه خالص.. فكره جد جدا..ـ
جميله جدا.. رافعه من معنوياتي جدا جدا.. ومخلياني احس ان بالرغم من كل اللخبطه اللي احنا فيها، الدنيا لسه فيها خير جدا جدا جدا !!!ـ
الفكره بمنتهى البساطه.. بتدور حوالين دنيا الخير..ـ
وحوالين الناس اللي يمكن مشغوله في حياتها و عندها سبعين الف حاجه ممكن تاخدها بعيد جدا عن اي افكار او نشاطات جانبيه انما ساعة الجد ومع اول اشارة استغاثة من محتاج.. تلاقيهم اهتموا واتفاعلوا وفرغوا من وقتهم اللي يكفي للمساعدة..ـ
زي ما يكونوا مابيصدقوا حد يطلب منهم حاجه.. او زي مايكونوا مخزنين جواهم طاقة و مستنين حد يدلهم يفرغوها ازاي و فين!!ـ
الناس دي كلها شباب زينا.. كل واحد فيهم وصّلنا للتاني ولو طلبنا منهم حاجه تانيه مش هايتاخروا و هايدوروا و هايساعدوا على قد مايقدروا..ـ
وده اقصى اللي باتمناه.. ان اللي يقدر على حاجه يعملها .. اللي تنطلب منه حاجه يقدر عليها ما يتاخرش.. اللي يتسال سؤال ويعرف اجابته يقول.. واللي يعرف حد في ايده حل لمشكلة حد تاني يدله عليه.... اللي يحس انه ممكن يبقى خيط في شبكة خير يوصله و مايخافش..ـ
صدقوني.. بعد سنين كلام كتير.. كلام سياسه و كلام كبير.. اعراض و شجب و احتجاج.. ورفض للواقع و للظروف .. ولعن للحكومه و عمايلها السوده.. وحسرة و مصمصة شفايف على ناس بتموت مالجوع و من البرد..ـ
فهمت و اتعلمت.. ان الحل عمره ما هييجي من فوق.. مشكلتنا تحت ولازم حلها يبقى من تحت.. مننا في بعضنا.. احنا بس اللي هانحس ببعض.. واحنا بس اللي هانفهم بعض.. و عشان كده.. احنا بس اللي هانقدر نساعد بعض..ـ
من فضلكم.. لو سمحتوا.. اللي يقدر على اي حاجه.. يعملها يا جماعه..ـ
تفتكروا لو كان حصل حاجه لفريق النادي الاهلي كان هايجرى ايه في البلد؟؟
واوعوا حد يقولي ولا حاجه علشان فريق الاهلي ده هو القشه اللي الناس كلها متعلقه بيها..ـ
الكوره كلها كانت الحاجه الوحيده اللي فرحتهم اكتر من مره في الفتره اللي فاتت..ـ هي الحدث الوحيد اللي هتفوا فيه من قلبهم..ـ
اينعم كان في ناس بتولول وبتنعي غرقاهم في العباره انما باقي ومعظم الناس كانت بتزغرط للكوره..ـ
ايوه كان في حوادث قطورات تشيب العيال انما كان في انتصارات كروية تسر القلب الحزين..ـ
ايوه مافيش ميه انما في كاس السوبر ونادي القرن..!!ـ
علشان كده محدش يقولي مكانش هايحصل حاجه لو فريق النادي الاهلي كان راح في الحادثة المأساوية بتاعة الطيارة دي.. لان بمنتهى البساطه الحادثة دي كانت هاتدمر رمز السعادة والنصر للشعب المصري المطحون..!ـ
ولكن الله سلّللللّّّم..ـ
<<Home
