و ياما تعبت و استنيت
حلفت اثبت لكل الناس
اني هالاقي لو ضحيت!!ـ
وقلت هاتعوضني بيك .. و عدتني
ضحيت بعمري و ثقت فيك.. كسرتني
و اتاريني علقت روحي بحبال دايبه
ضيعت وقتي في مجازفه خايبه
مشيت ورا قلبي و اخترتك
ضحيتلك.. ضحيت بي!!!ـ
اكيد دي مش الاغنيه الوحيده اللي بتتكلم عن الفكره دي ولا عن النوع ده من المشاعر و العلاقات .. بس مش عارفه ليه كل ماسمع الاغنيه دي تحديدا واركز في كلامها.. بافكر في مبدأ الحب ده و كانه فكره متضاربه جدا.. على الاقل جوايا..!ـ
هو فعلا الحب حباله دايبه؟؟
طب هو فعلا الحب مجازفه خايبه؟؟
هو احنا المفروض نحب ولا لأ؟؟ هو في اصلا حب بجد؟؟ طب ليه دايما القلب و العقل مش متفقين فيه؟؟!؟
اسئلة كتير اوي لسه بتملاني كل مافكر في موضوع القلب و العقل ده.. و رغم اني المفروض شفت كتير و اتعلمت من الدنيا و من الناس حاجات كتير -يمكن تكون اكتر من اللازم- انما لحد دلوقتي لسه مش قادره افهم.. او فاهمه و مش عارفه انفذ اللي فهمته!!ـ
هو الحب عطاء لمالا نهايه.. و لا الحب زي اي حاجه في الدنيا لازم يكون اخد و عطا.. وبعدين مين اللي المفروض يدي التاني اكتر.. يعني تحب اللي يحبك علشان بيحبك اوي ولا تحب انت الاول اوي حتى لو ماكانش هو بيحبك!!ـ
مش بيضه ولا فرخه.. ولا الحكايه ناقصه حيره..!ـ
بس عارفه ان الحب مش قرار و انك المفروض تنكفي على وشك و تلاقي روحك سايباك ورايحه لحد تاني بس لانها بتحب تكون معاه اكتر ما تكون معاك لوحدك.. بس هو ده بيحصل بجد ولا ده كلام سيما؟؟!؟
ايوه برضه عارفه ان في ناس بتحب بعض اوي.. الحب اللي هو نفسه بتاع السيما.. او على الاقل بيقولوا كده او ظاهرهم كده.. واحنا لينا الظاهر..!ـ
بس اللي انا لسه مش عارفاه.. هو فين مصدر الحب.. بيبتدي بجد امتى وفين.. وفين مقره في البني ادم.. القلب ولا العقل.. طب لو حصل تضارب بين القلب و العقل.. نمشي ورا مين فيهم.. نحب و خلاص و نبقى من مدرسة الحب من غير امل اسمى معاني الوجود.. ولا نحسبها بالورقه و القلم و نبقى من مدرسة اللي يحسب الحسابات في الهنا يبات؟؟
حلوه اوي فكرة انك تلاقي نفسك مشدود لحد بشكل غريب.. واظن انها احلى بكتير من فكرة انك تلاقي حساباتك بتشاورلك على حد و تقرر تحبه او تعمل بتحبه علشان تقنع نفسك قبل ماتقنعه..!ـ
بس اللي مش حلو هي كسرة القلب.. لما يطلع اللي انت اتشديتله مايستاهلش ولا مابيفهمش او حتى مش حاسس بيك و لا عارف انك موجود اصلا.. او لو اتجاوب معاك و عجبه الحال.. وطلع بيتسلى ولا بيجرب ولا حتى رجع في كلامه و استخدم حقه الطبيعي كانسان ممكن يقول حاجه و يرجع فيها..!ـ
ساعتها الخبطه بتبقى دوبل.. ووجعها برضه بيبقى دوبل.. وجعك و ضيقك منه ومن الموقف.. ووجعك وحزنك على نفسك.. وممكن يزيد عليهم ضربك لدماغك بالجزمه.. والتأنيب و التعذيب و كنتي فين يا لأ لما قلت آآآآآه!!ـ
الخلاصه لاني حاسه ان الموضوع ده "إندليس" زي ما بنقول بالانجليزي.. عمر الكلام فيه ما هايخلص و عمره ما هايكون له نتيجه يتفق عليها كل الناس و يفهموها.. بس اللي انا للاسف حاساه وواصلني اوي ان ممكن يكون في ناس مش مكتوبلها تحس الحب الصح او مش مكتوبلها تقابل الحب الصح على الاقل مش في الوقت الصح.. و الناس دي كتيييييييييير اوي.....ـ
وانا واحده منهم..!ـ
Add a Comment
from Egypt
said:فاكره لما كنا مروحين مشى؟
لحظة ما قلتيلى الاغنيه دى بتفكرك بيا..
فى لحظة ما الدمعه حرقت خدى و احنا حاطين السماعات و بنسمعها مع بعض..
عشان انتى حاسيتيها و حاسيتينى من غير ما تشوفى الدمعه اللى مستخبيه ورا النضاره..
ايوه..
عايزين حب بس..نتعمى و منحسبهاش..
عايزين كل حاجه لازم نحسبها
و فى النهايه..اه..فى ناس فقر و مش حتحب صح..زى..
و ان شاء الله مش زيك
from Egypt
said:يمكن دي اول مره اعلق علي كلام اغلي انسانه في حياتي بعد امي ..اختي الصغيره في حسابات السنين ( الكبيره في حياتي ).. لا مؤاخذه يا اينا ...دايما كنت بؤلها حبي ..عيشي قصة حب طوييييييييييييييييييييييله ..حبي بقلبك ..حاربي عشان اللي بتحبيه (بس يكون يستاهل يا اينا) مش (تيكيلم تيكيلم)..صدئيني بجد الحب مالوش لا قواعد ولا هباب عشان كده لما العقل بيدخل فيه ...بيبوظ..بوظان الجبنه بره التلاجه كده ...نفسي اؤلك يا احب الاخوات الي قلبي عيشي يا حبيبتي كل ثانيه ف حياتك ...اوعي تبصي وراكي ..اوعي ترسمي دايره اد الحق وتفضلي حابسه نفسك فيها ..انا عارفه انك بتتظاهري بالقوة و انك ضاربة الدنيا مييييت صرمة و الناس دايما بتشوف شخصية اقوي من الحجر و وئتها بكون انا متاكده ان في جوتكي شلالات من الدموع المحبوسه و الخناء دايما شغال بين قلبك و عقلك و دي المشكله ...يمكن مش بعرف اؤلك حاجات كتيير و احنا ادام بعض و يمكن لئيتها فرصة اكلمك هنا يمكن عشان اسيب دموعي على راحتها و اخدك ف حضني و اطبطب عليكي و اؤلك يا اينا انا بحبك اوي يمكن لينا مواقف كنت فيه الاخت الغلسه شويه بس والله من حبي فيكي و من خوفي عليكي ...يمكن انت يكون عندك ناس كتيير يعوضوكي عني ...لكن انا بجد ما ليش غيرك...ربن يخليكي ليا...هؤلك تاني ارمي كل حاجة ورا ضهرك و عيشي الدنيا صح ...حبي و انحبي سيبي البك ...اطلقي صراحه شوية و صدئيني بكره اكيد احلي من النهارده ...بحبك يا اينا مهما اختلفت ارائنا او تصرفاتنابحبك عشان انت بجد من نعم ربنا عليا و دايما بئول لبناتي حبو بعض زي ما انا و اينا بنحب بعض ...مش مهم بنختلف ف ايه او بنتفق علي ايه بس بنحب بعض اوي ...و وقت اللزوم بنكون (رجاله ...و وئفنا وئفه رجاله )هههههههه......ربونا يخليكي ليا و اشوفك اسعد الناس يا بت يا اينا
from Egypt
said:وااا عجبي عليك انت كمان يا احمد..ـ
فعلا الكل بيفتي في الحب .. لكن المهم هو الاحساس بجد!!ـ
اخبار الجبس ايه؟؟؟
from Egypt
said:يا ستي زيي ولا زيك.. كل واحد هايشوف اللي مكتوبله يشوفه.. وبعد الكومنت اللي تحتك ده نورت في ام رأسي فكرة ان ممكن صح الواحد مش مكتوبله حب رومانتيكي انما عنده كمية حب من نوع اخر جمييييييل.. شفتي الهنا اللي انا فيه!!ـ
from Egypt
said:هو السح ده مكتوب علينا واحنا مبسوطين.. واحنا زعلانين و حتى واحنا بنحب بعض يا كمااااال.. طبعا انا هاحاول اقلبها تهريج علشان خلصنا جرعة النكد في التليفون.. ربنا يخليكي لي يا ايم.. و خليكي دايما فاكره انك مهما كبرتي هاتفضلي اختي الصغيره اللي باحبها زي ماباحب نفسي و العيال الكلاب اللي في ثري سي.. حسنا انه.. فلنذهب الان الى "الجريشن بتاع مريم" حتى لا تقتلنا الخنفساء البيضاء في اليوم الاسود.. وسمعني احلى سلام للمعلم اتش و الكرافته بتاعته... إنّه!!ـ
ايه كمية النكد دي ؟ علي الرغم ان الاغنية كلماتها حلوة جدا بس موقفتش معها كتير لاني بصراحة ملهاش موقف في حياتي ههههه تخيلي الكارثة اني مش عايز احب الحب ده لاني مش مستلطف نفسي وانا سرحان ولا شارد ولا الحاجات التانية وبقول كفاية حب امي والماستر بتاعي لحد الي اسمه قلب ده يحس شوية .انا
كريم عارف ان حالتي غريبة ونادره بس عايش
from Egypt
said:هي بصراحه المشكله مشكلة احساس يا كريم زي مانت قلت.. مش موضوع استلطاف ولا استظراف ولا عاجبك شكلك وانت سرحان ولا مش عاجبك.. ولو كنت مقتنع ان الحب قرار يبقى انت من اتباع مدرسة اللي يحسب الحسابات في الهنا يبات و ده طبعا مش عيب..!ـ
Add a Comment
<<Home
from Egypt
لا تعليق
رغم ان الكل يفتون ف يالحب لكن في نفس الوقت الكل يشتكون منه
في الحب لا اقول سوى
وااعجبي عليه.............!!