اللعبه المطلوب فيها ان كل واحد يفكر في حلم غير واقعي تماما يتمنى يعيشه في اللحظه دي..ـ
حلوه الفكوره ومن غير تفكير كتير.. في دوري قلت اني عايزه اكون بطلة فيلم سليبلس ان سياتل!!ـ
باموووت في الفيلم ده.. باحب كل حاجه فيه.. باحس انه مرجعيه!!ـ
يمكن لانه تقريبا اول فيلم رومانسي اتفرج عليه وانا صغيره و ياثر في اوي.. اوي جدا يعني!!ـ
المهم و الظريف بقى اني من بعد ماللعبه خلصت و القعده انفضت.. فضلت فكرة اللعبه في دماغي.. و اكتشفت ان دماغي فيها احلام تانيه كتير تنفع اجابه للسؤال..ـ
نفسي اكون ميج رايان في فيلم يو’ف جوت ميل.. برضه كان عندها تلاتين سنه!!ـ
نفسي اعمل عيد ميلاد بجد و يحضره ناس كتير.. كلهم باحبهم و بيحبوا بعض!!!ـ
نفسي اكون في مركب في النيل ساعة الشروق.. في اسواااان!!ـ
نفسي اشوف شوقي.. الله يرحمه!!ـ
نفسي في عربيه مكشوفه طايره على طريق اسكندريه الصحراوي... وشعري طاير معاها في الهوا!!!ـ
نفسي ارجع ابتدائي تاني.. من غير اصابات كتير!!ـ
نفسي اقابل ندى الرفاعي صدفه.. في سوريا!!ـ
لسه نفسي في حاجات كتير .. بس صباعي واجعني اوي!!!!!ـ
احس ان الحياه فيها ناس جميله و فيها احاسيس اجمل..ـ
احس ان لسه في ناس بتحب و عايزه تدّي..ـ
النهارده كتير كنت باخرج بّرايا و اتفرج على نفسي و عليهم..ـ
اد ايه كنا حلوين..ـ
اد ايه كان الكلام واضح وصريح..ـ
اد ايه كانت المشاعر حاضره و واصله بينا..ـ
اد ايه كنا صادقين..ـ
ضحكنا و بكينا .. غنّينا و قرينا..ـ
اتكلمنا.. لأ.. رغينا..!ـ
قلنا اللي في قلب كل واحد فينا..ـ
كلام كتير محدش سمعه قبلينا..ـ
حتى الكلام اللي اتقال.. من غير كلام..!ـ
مكانش فهمه صعب علينا!!ـ
طبطبه حنينه و لمسة ايد..ـ
خللو كل واحد فينا يقوم سعيد..ـ
سعيد انه واحد في الدايره دي..ـ
و خللوني انا بالذات افكر امسح البوست اللي فات..ـ
و اعيش بسببهم .. احساس جديد..!ـ
بحبكم اوي..ـ
شكرا رشا و شكرا وليد..ـ
قلتله اني مؤخرا بقيت كتير باتمنى الحياه تخلص بقى..!!ـ
وقدام خضته واستغرابه الشديد من كلامي ورغم فهمه لظروفي وضيقي الشديد..ـ
حسيت اني لازم اهون عليه وافهمه..ـ
ان الحكايه مش حكاية حزن واكتئاب.. ايوه مش بانكر ان الوقت صعب و الايام تقيله.. انما الوجع مش ابن النهارده ولا امبارح..ـ
دي زي ماتفقنا عليها انا وهو.. " اوجاع مألوفه ".. بقت معانا زي دوشة الجيران.. زي الضلمه في الشوارع و الزحمه في الميدان!!ـ
كل الحكايه اني وبكل بساطه.. تعبت..!ـ
مش زعل منها و لا عليها.. بس بجد مابقاش عندي رغبه اكمل الدور..ـ
عايزه اقول فركش واخرج بره الكادر..!ـ
ورغم الأُلفة بيني و بين الزمان و المكان..ـ
ورغم لحظات السعاده اللي بنخطفها من الدنيا غصب..ـ
ورغم الصحبه اللي بتجمعنا انسان و انسان و انسان..ـ
بيزيد جوايا يوم بعد يوم احساسي.. بانه آن الاوان..ـ
شخابيط.. نقط وحروف..ـ كلام على المتغطي.. و كلام على المكشوف..ـ كلام وراه كلام.. بس افهموا يا ناس..ـ و اللي ماهوش اعمى من الغربال يشوف..ـ ياما وياما كلام معناه ماهوش معروف..ـ سطور وسطور تنرص .. قدام عينيك ماتشوف..ـ وياما حرف يدب في القلب ليه احساس..ـ مهما يكون شارد ولونه كده مخطوف..!ـ الناس ماهياش عميه.. الناس ماليها الخوف..ـ الكل ماشي مغمي.. كمن يضره الشوف..ـ امتى النهار يطرح في العين حروف تنباس..ـ و الشوف يبات نعمه ويبقى الكلام مألوف..؟
عايشه الزحمه في كل مكان.. في البيت و الشغل و اصحاب كتير..ـ
بس للاسف.. في الوقت ده في ناس كتير بتتحرك في حياتي كل يوم..ـ
بتدخل و تخرج..ـ
تملا مربعات ماتزيدش عن سنتيمترات .. و تسيب فراغات تتقاس بالمتر..ـ
وتسبب اوجاع بالكوم!!ـ
بقيت حاسه اني تايهه.. مش عارفه احدد انا بانتمي لايه.. فين صحابي بجد.. ايه شغلتي الحقيقيه..ـ
و قبل كل ده .. انا اصلا مين!!!؟
باعمل خمسين حاجه مش باحبهم.. وباحب مليون حاجه و مش باعملهم..!ـ
احلامي مالهاش حصر.. ولسه ولا واحد منهم اتحقق..!ـ
ايامي بتعدي بسرعه.. مع ان ساعاتها طويله وممله..!ـ
عايشه في قلب الناس.. بس طول الوقت لوحدي..!ـ
باحب وضوحي جدا.. وكتير باكون مش فاهماني..!
انسان غريب انا.. على الارض اوي.. بس عايشه في كوكب تاني!!ـ
ان يتحول اسم مدونتي الموقرة الى "باحلم على قدّي" و ذلك بدءاً من اليوم وحتى اشعار اخر..ـ
وذلك بناءا على احساس مفاجئ بالرغبه الشديدة في التعبير عن محتواها بالعربي.. ـ
يمكن لاني من كام يوم كنت باتكلم مع صديق بالانجليزي و فجأه قلبت عربي و حسيت اني حابه اكتب عربي وهو لاحظ التغيير ده و لما قلتله ان ساعات كتير باحس حاجات بالعربي و ماينفعش اكتبها غير بالعربي برضه..ـ
قاللي طبيعي و علشان كده بيسموها اللغة الام.. و انا احتراما مني للغتي الام و احساسي بيها قررت اعمل التغيير ده..ـ
و مما سبق فاني اتوجه الان و من هذا المكان بدعوة الى كل من يمر من هذا المكان و كل من يشهد هذا الموقف المهيب ان كان لديه اي اعتراض فليتكلم الان او يصمت للابد..ـ
التوقيع : اينــــــــو
1/5/2007
<<Home
