بـاحـلم علـــى قـدّي....ـ

عارفين لما يكون في عندنا حبة قمح و نحطها على قطنه مبلوله و نتفرج عليها تكبر يوم بعد يوم.. ماظنش في الوقت ده حد فينا بيبقى متخيل ان الحبه دي في لحظه ممكن تكبر و تطرح ..!!ـ
ده بالضبط كان احساسي امبارح.. ماكنتش قادره استوعب اللي بيحصل.. و الحقيقه مازلت!!ـ

تصدقوا.. مريم اتخطبت..!ـ

ومحدش يقولي مريم مين .. مريم دي بنت اختي.. يعني تقدروا تقولوا بنتي!!ـ
حد صغنون و مفستك جدا او يعني انا كنت متخيله انها صغنونه و هاتفضل صغنونه على طول.. بس اكتشفت امبارح انها كبرت و بقت عروسه..!!ـ
امبارح كانت خطوبة مريوكا الفستوكه.. اول حفيده في عيلتنا و اول فرحتنا.. بنوته انتوكه في نفسها.. لذيذه و رقيقه زي امها.. دمها خفيف و كوميديه زي ابوها.. و ذوقها جميل و فنانه زي خالتها طبعا..!!ـ
مش عارفه احكي اد ايه انا مبسوطه بيها و بخطيبها الجميل.. بس عايزاكم كلكم تدعولها ربنا يوفقها و يتمملها فرحتها على خير..ـ

وزغاريط بقى على اد ماتقدروا علشان انا زي خيبتي مش باعرف ازغرط!!!ـ