خصوصا لما البشر دول يكونوا قريبين مني .. باحسهم من عينيهم .. باحدد هم بيعملوا ايه و ليه..ـ
باتاكد من عنيهم اذا كانوا همّ نفسهم و لاّ ناس غيرهم.. ناس تانيه ماعرفهمش..!!ـ
علشان كده لما بانجرح من حد منهم باحب اشوف عينيهم.. باحب ابص فيهم..ـ
يمكن بحاول اتاكد انهم عملوا كده من غير قصد.. انهم مش نفسهم حبايبي الطيبين.. و ان ارواح شريره لبستهم.. ملكتهم و سيَرتهم.. حلٍٍت في عنيهم حرجي.. و يمكن بجايزه وعدتهم..!ـ
ورغم اني بطلت استغرب من اي حاجه بتحصل في الدنيا و لا بقيت بادور على اسباب و مبررات لتصرفات البشر..ـ
لان كل شيء بقى متوقع و ممكن و مش بعيد ابدا..ـ
الا اني لسه مش بافهم قدرة الناس على جرح بعضها دي جايه منين.. ايه الاستمتاع فيها.. ايه الدافع وراها.. ايه العائد منها.. لسه مش فاهمه!!ـ
سالني صديقي مره و عيني في عنيه.. هو انتي مستغرباني؟؟
قلتله لا..و استغرب ليه !!ـ
بطلت استغرب.. من كتر ماشفت
بطلت ابكي .. من كتر ماحزنت
لمحت في عيونه دموع.. حسيتها اوي و صدقتها..ـ
مديت ايدي بكل سذاجه.. مسحتها..ـ
بس الغريب اني تاني يوم اكتشفت ..ـ
انه كتّر خيره.. كان بيعلمني ان عيون البشر.... ابدا مش كفايه..!!ـ
الاسبوع اللي فات كنت عايزه اقول ان احساس الرمله الساقعه بين صوابع رجليّ.. الساعه واحده بالليل.. قدام بحر اسكندريه.. و تحت بدر تمام.. و نجوم بتعافر تبان.. احساس رااااائع جدا مافيش حاجه ممكن تعادله الا لو فجأه و في عز نومك على الرمل تجيلك مكالمه من حد ليك معاه ذكريات جميله اوي يقولك ان بينه و بينك كام متر!!!ـ
وامبارح كنت عايزه اقول ان احساس القعده في مكان جميل و فاضي ماليه الهوا و نور القمر من كل اتجاه.. و شعر نجم و اغاني منير و الشيخ امام.. مع صحبه جميله بتحب بعض اوي.. احساس راااااائع جدا جدا صعب اي حاجه تقطعه غير طيف حد عزيز اوي ومختفي من فتره طويله.. تكتشف انه واحشك و تتمنى يكون قاعد معاك في اللحظه دي!!ـ
النهارده بقى عايزه اقول ان احساس الصحاب بجد اللي تلاقيهم معاك في اي لحظه و في كل لحظه.. و اللي تلاقي نفسك عايز تبقى معاهم في كل مواقف حياتهم و عايزهم معاك في كل مواقف حياتك احساس رااااااائع جدا جدا جدا مش ممكن حاجه تغلبه الا نفس الصحاب دول وهم بيطبطبوا عليك ودموعك نازله من غير كسوف قدامهم !!ـ
اخيرا قلت جزء من اللي نفسي فيه.. و الباقي مره تانيه!!ـ
<<Home
