Tuesday, April 22, 2008
الفتره اللي فاتت لما ابتديت اكتب حاجات غريبه من طفولتي السعيدة.. كان في الخطة اني اكتب عن القطط في حياتي..ـ
علاقتي بالقطط طول عمرها علاقة غريبه جدا..!ـ
يعني افتكر اني من اول مابتديت استوعب شكل عيلتنا ..فهمت اننا عيله مكونه من اب و ام و اربع اولاد... و قطه!!ـ
فاكره كمان اني كنت دايما بافطر انا و القطه الصبح مع بعض.. كان دايما على التربيزه بيضه لي و بيضه ليها!!ـ
القطه دي كانت رومي بيضا جدا.. البياض الغبي اللي يزغلل عينك لو ركزت فيه شويتين .. و افتكر ان بوسي دي (على اعتبار ان كل القطط زمان كان لازم اسمها يبقى بوسي) كانت بتفضل قاعده على باب الشقه مستنياني لما ارجع و كانت لمعة عينيها هي اول حاجه باشوفها اول ما نفتح باب الشقه في الضلمه!!ـ
في مره من المرات واحنا نازلين مصر اجازه مالقيناش حد نسيب عنده بوسي.. وماعرفتش ودوها فين لحد لما رجعنا تاني و لقيتها في الجنينه تحت البيت مع ولادها.. ورغم انه مكانش ينفع نرجعها البيت تاني الا ان بوسي فضلت صاحبتي و فضلت انزلها اكل هي وولادها الكتير اللي مكانش ولا واحد منهم ابيض زيها.. واضح ان بوسي انحرفت جامد بعد ما سافرنا!!ـ
افتكر بقى حاجه لطيفه كمان في موضوع القطط ده.. ان انا لما كبرت شويه و بقيت اروح المدرسه و ارجع لوحدي.. كنت باحوش سندوتشاتي لاخر اليوم و اكلها للقطط في الطريق.. نوع من انواع الاغراء علشان ييجو معايا لحد البيت و نقعد نلعب سوا على باب الشقه لحد ما اهلي يرجعوا..!!ـ
افتكر كمان ان في وقت من الاوقات كان بيت جدتي الله يرحمها فيه حوالي اتناشر قطه.. قطة سيامي بتاعة ايهاب اخويا و مش عارفه لحد النهارده جابت الحداشر بيبي دول منين و لا كانت شايلاهم ازاي و لا حتى راحو فين بعد شويه..!ـ
لما كبرت بقى حباتي دخلها قطتين في مواقف غر يبه جدا.. اول واحده كانت قطه بلدي.. قطه بنت بلد جدا .. كانت من حواري الازهر.. كنت يوم في الموقع الاثري اللي كنت مشرفه عليه ورا الجامع الازهر و سمعت صوت قطه صغيره بتنونو نونوه اشبه بعياط البيبيهات.. و قلبت الدنيا علشان اعرف مكان القطه دي.. و سيبت العمال شغلهم و قعدنا ندور في كل حته لحد ما غلبنا .. ومره واحد بابص من الدور التاني على الشارع لقيت عربيه نص نقل كانت راكنه قدام الباب بتتحرك و ظهرت تحتها القطه النونو قوي .. مكرمشه في نفسها و لسه مغمضه..بالضبط زي البيبي اللي تاه من امه و مش قادر يندهلها لانه مش عارف حتى اسمها ايه!!ـ
القطه دي بقى اسمها زينه تيمنا باسم المكان اللي لقيتها فيه.. سبيل زين العابدين..ـ
زينه قعدت عندي في البيت حوالي سنتين و من اشهر ايامها اني صحيت مره بالليل على صوت غريب جدا.. و فوجئت ان الاخت زينه فضلت تلعب في الستاره و شدت منها خيط وواضح انها كانت بتلعب لعب عنيف حبتين لحد ما الستاره زهقت منها و قررت تخنقها.. و فعلا لقيتها تقريبا بتموت.. محدش يسالني بقى على باقي تفاصيل الليله السوده دي لان كل اللي هاعرف احكيه انها الحمد لله ربنا نجاها.. و اني قطعت الخلف!!ـ
زينه فضلت في البيت لحد مافي يوم جابوا واحد يصلح البوتاجاز.. و اول ماشافها جنب الباب .. تصور منه لله انها جايه من بره مش من جوه.. فتطوع مشكورا انه يطلعها بره البيت .. و طبعا على ماخدوا بالهم انها مش موجوده.. كانت اختفت!!ـ
واخيرا و ليس اخرا.. "كوشي" احلى قط في تاريخي القططي.. قط شيرازي رمادي مقطط .. عاصر معايا فتره من اسوأ ايام حياتي.. ياما سهرنا بالليل نحكي و نشكي سوا.. و انا اعيط وهو ينونو!!ـ
مش حابه احكي كتير لا عن حياة كوشي معايا و لا عن موته .. انما كل اللي عايزه اقوله اني بجد مفتقداه و باشوفه في كل مكان في البيت و باسمعه في كل وقت و باساتناه يجري عليا اول مافتح باب البيت..!ـ
مش هيافه و الله .. بس يمكن عشره و ارتباط عاطفي في ظروف صعبه..ـ
المهم في الاخر عايزه اقول ان القطط دي من اجمل مخلوقات الله و انها مش بتاكل و تنكر زي مالناس بتقول و انها حنينه جدا و ان جواها كم من المشاعر ممكن يعوض اي بني ادم عن سخافة الايام اللي بيعيشها وسط البشر الهايلين اللي شايفين نفسهم احسن من اي حيوانات خلقها ربنا..ـ
Add a Comment
On May, 15, 2008 5:34 PM , emoussa
from Egypt
said:
from Egypt
said:el2otat di yabny ka2en gameeeeeeeeel... a7la min elnas begadd! 
Add a Comment
<<Home
from Egypt
أيام ما كنت عايش في المنيا كانت قطط المدينة أديلها أي أكل تقوم جايا ورايا لغايت الأوضة
المدينة الجامعية