بـاحـلم علـــى قـدّي....ـ

من معتقداتي الراسخه في الفتره الاخيره ان الاجهزه الالكترونية في حياتي تسمع و تشعر و تتفاعل مع كلامي عنها و تصرفاتي تجاهها..ـ

بالعربي يعني.. الاجهزه بنت اللذينه اللي عندي كلها دماغها جزمه زي صاحبتها و العند راكبها من ساسها لراسها.. اول ماتسمع او تحس بنية التغيير و التطوير .. تقلب قلل قناوي.. و تجيب ميه من كل ناحيه.. و فين يوجعك يا اينو .. الموبايل لما فكرت مجرد تفكير اني اغيره .. قلب فردة قبقاب.. لا استقبال ولا ارسال و لا حتى سيجنال.. و بيعيني بقى لو جدعه..!!ـ

طبعا مش محتاجه اقولكم انه لما اتعرض للبيع جاب حوالي اتنين رغيف بلدي و بربع جنيه جبنه قريش و انا اصلا مش باحب العيش البلدي و لا الجبنه القريش.. لذلك و عندا فيه وعلى اعتبار ان دماغي اجزم من دماغه و انه ماعاش و لا كان اللي ينزل كلمتي الارض فانا بعته برضه و تصدقت بالعيش و الجبنه القريش على باب مقابر ابناء تفهنا العزب!!ـ

و غير بعيد اطلاقا عن هذه القصة .. كانت قصة الاخ اللاب توب.. حبيبي و ابن حبيبي.. و اللي عارف اني مش باعرف اعيش من غيره و اني لما اقرر اغيره مش هابيعه الاول و بعدين اجيب غيره .. نوووو نيفر ابسوليوتلي... هاجيب واحد تاني في لحظتها و سلم و استلم.. بس ازاي.. لازم الدماغ الغبيه تلعب لعبها .. اول ما قلت في زلة لسان اني عايزه اغير اللاب توب و اجيب حاجه احدث .. و انا قاعده في امان الله في "الان لو نوتر" صديقي الصدوق.. اللاب توب لمس طرف التربيزه .. لمسه لا تتعدى قوتها اتنين و هسه من اللمسه بمقياس تختخ للخبطات.. و عينك ماتشوف الا الضلمه و التهنيج و الويندوز اللي مش عايز يقوم و الهارد اللي ضرب!!!!ـ

و تاني تاني تاني.. راجعين انا و انت تاني .. لهارد ديسك جديد .. من تاااااني.. و نحاول ننقذ ما يمكن انقاذه من الشغل و الفايلات و الصور..!!ـ

بس الحقيقه و بكل تواضع كلمتي نزلت المرادي.. و قدمت فروض الولاء و الطاعة و قدمتله اعتذار على فلاش ميموري واحد جيجا.. علشان يرضى علي و على اهلي و يشتغل كويس..ـ

لكن على اعتبار اني عارفه انه مش بيدخل عالبلوج عندي .. فانا باعلنها من هنا و بكل قوة و فخر.. ان النية مازالت موجوده لتغيير اللاب توب ولو بعد حين و اني لن اتنحى عن موقفي القوي الصامد العتيد.....ـ

بس واحياة ابوكم ماحد يقوله...!ـ