يعني هو مش بقى عندي مشكله.. انا طول عمري عندي مشكله معاهم بس اليومين دول الموضوع بيكبر و يزيد.. يمكن لاني بقيت باقتنع اكتر ان الواحد المفروض يقول بس الكلام اللي هو بيعنيه.. الكلام اللي طالع من جواه .. وان مفيش حاجه تستاهل ابدا انك تكذب او تالف كلام اي كلام..ـ 

ايوه معنديش مشكله انك تقول حقايق كتير و تبالغ شويه صغيرين يعني على الاقل من باب التجميل اومن باب تحسين الروايه  و التشويق.. او تقول حاجات بتتمناها او تتمنى تتحقق بس قوللي انها امنيات .. ماتفردش قلوعك علي و تقنعني انها حقيقه مؤكده و ان الكلام ده متسجل في الشهر العقاري و براءة اختراعه باسمك.. بلاش نصب بقى يا جدعان!!ـ

و على فكره انا مشكلتي في الحكايه دي مش بس مع الناس اللي بتكذب بكلام حلو اوي زياده عن اللزوم .. لا وكمان مع الناس اللي بتكذب بكلام و حش اوي زياده عن اللزوم.. الاتنين مايتخيروش عن بعض!!ـ