بجد نفسي اعرف مين اللي علمني اركب عجل.. كل الاطفال اللي قابلتهم في حياتي في حد علمهم يركبوا العجل.. دايما باشوف المنظر ده .. طفل .. ولد او بنت .. راكب عجله و حد كبير ماسك العجله من ورا و بيجري وراه يوزنه و خطوه و التانيه يسيبه يبدل لوحده.. ويادوبك لفتين و يتكفي الطفل الجميل على جنبه هو والعجله!!ـ انا بقى مشكلتي اني طول عمري باركب عجل كويس جدااااا الحمد لله .. انما مش فاكره ابدا مين اللي كان بيمسك عجلتي و يسندني و الحقيقه انا كمان مش فاكره اصلا اذا كان ده حصل و لا لأ!!ـ المهم بقى في موضوع العجل ده.. اني فاكره كويس جدا لما كانوا ولاد خالتي يجيبوا عجلهم و ييجوا عندنا في الكومباوند اخر الاسبوع و نعمل مغامرات جباره.. و على اعتبار اني كنت الكبيره و انهم في منطقتي .. كانت المغامرات دي دايما تحت قيادتي الرشيده.. و غالبا ماكانت بتنتهي بمصيبه طبعا!!ـ فاكره كويس اننا كنا بندور على اماكن جديده نستكشفها .. و نطلع الجبال و نمشي على اثار خطوات الناس في الرمل.. و نحقق ونراقب.. و نحاول نربط كل اللي بنشوفه و نلاقيه باي قصه مرعبه ممكن نكون سمعناها.. في الوقت ده كان في اشاعات كتير عن بنات اتخطفت و شقق اتسرقت.. و طبعا كل الاهالي كانت عامله حظر تجول .. بس على مين..!!ـ افتكر اننا في طلعه من طلعات الجبل السريه بتاعتنا دي اكتشفنا حاجه زي العشه الخوص.. حد عاملها فوق الجبل و مغطيها بالبلاستك و دخلناها و احنا مرعوبين و رجلينا بتخبط في بعضيها.. و بعد خمس ثواني سمعنا صوت بيقرب و من غير ما نبص الصوت جاي منين و لا نبص حتى لبعضينا.. طلعنا نجري احنا التلاته و خدنا العجل و طرنا ولا كاننا احنا اللي خاطفين البنات و سارقين البيوت!!ـ علاقتي بالعجل اتطورت اوي مع الوقت.. يمكن في القاهره كانت فكرة ركوب العجل مستحيله.. انما ربنا يخليلنا الصيف و العجمي.. و الراجل بتاع العجل.. كانت احلى اوقاتي اللي باقضيها انا و العجله و الووكمان في وداني.. اسمع فيروز و منير و افضل الف و ادور من هنا لهنا.. جوه القريه و براها .. لحد ماتهد من التعب و اروح ارجع العجله و اقعد شويه عالبحر لغاية ماتلم على عضلات رجلي اللي هاتشيلني لحد البيت!!ـ حتى لما اتجوزت و سافرت.. العجل كان ليه دور مهم جدا في حياتي.. يمكن لانه كان من النقط القليله اللي كانت بتجمعنا.. و اللي كانت بتهون علي حاجات كتير.. و يمكن كمان كان موضوع العجل ده من اكتر الحاجات اللي حبيتها و احترمتها في السويد .. هناك تقدر تروح اي مكان بالعجله.. الطريق متجهز و فيه حارات و اشارات مخصوصه لمرور العجل.. يعني مكانش غريب انك تلاقي بهوات بالبدل الشيك راكبين العجل و رايحين شغلهم عادي جداااااا..ـ فرحت اوي..ـ و زعلت اوي..ـ لما لقيت مفتاح العجله لسه في ميدالية مفاتيحي!!ـ
بقالي كام يوم عماله بافتكر حاجات كتير قديمه.. حاجات و انا صغيره اوي- مع اني ماظنش ان عمري كنت صغيره اوي- يعني ايام ابتدائي و الطفولة المشرده الرائعه اللي انا عشتها..ـ
بجد مش هزار انا عشت واحده من احلى سبع طفولات في تاريخ البشريه!!ـ
ساعات افتكر فترة ماقبل المدرسه.. طبعا انا امي كانت امرأة عاملة على سن و رمح لازم كل يوم تروح شغلها الصبح بدري و بالتالي كان لازم اروح في مكان ما.. المكان دا بقى كان عند طنط ساميه..ـ
طنط ساميه كانت مراة واحد صاحب ابويا و ساكنين معانا في نفس الكومباوند و كان عندها بنت قدي بالضبط.. كانت ست طيبه جدا و عمليه جدا.. و على اعتبار انها مش بتشتغل في اي مكان .. قررت تعمل مشروع حضانه في البيت لاولاد صحابها و جيرانها اللي بيشتغلوا و مش عارفين يودوا و لادهم فين.. واهو كله بتمنه و بثوابه.. مشروع لطيف جدا انقذ امي من مشكله كبيره!!ـ
المهم كل يوم الصبح مش فاكره ازاي و لامين اللي كان بيوديني عند طنط ساميه.. نفضل نلعب نلعب و ننام و نصحى و نرجع نلعب .. كنت انا و مها بنتها و معانا كام ولد و بنت تانيين.. نطلع فوق الكراسي و ننزل تحت الترابيزات و الجدع اللي يسكتنا بقى !!ـ
فاكره كمان ان طنط ساميه كانت اول واحده في حياتي اشوفها تدمج وزارة النقل و المواصلات مع وزارة التموين..!ـ
الاكل عندها كان دايما عربيات و قطورات تترص على الترابيزه قدام التليفزيون و احنا نلف حواليها و ناكل في كل لفه قطمه لحد الكارتون مايخلص!!ـ
لحد النهارده من وقت للتاني.. باعرف اخبار طنط ساميه و مها.. لسه باحبها جدا زي زمان.. و لسه بتقولي اسم الدلع اللي مش باحب اي حد يقولهولي بس مش باقدر اقولها حاجه..ـ
مهما كان دي برضه ماما ساميه!!!ـ
كل اما عنه يسالوني..ـ يمكن عشان رقة مشاعره..ـ يمكن عشان حزنه المخبي..ـ مش عارفه ليه..ـ انا نفسي ياما سالت نفسي..ـ بالاقيني مره سؤالي اجاوب..ـ مادام عرفت اني باحبه.. هايفيدني ايه..!ـ رد السؤال هايزيد مشاعري و اشتياقي؟ هايخلي قلبه يضمني عمري اللي باقي؟ لو كان كده .. دانا كنت الاقي..ـ حبيته ليه!؟
